एजेन्सी – युवा स्पिन अलराउन्डर आयन अफ्जल खानले आइसिसी यू-१९ विश्वकप एसिया छनोटमा यूएईको कप्तानी गरेका छन् । घरेलु टोली युएईले पहिलो खेलमा आजमानमा रहेको मलेक क्रिकेट ग्राउन्डमा टस हारेर मलेसियाविरुद्ध पहिला फिल्डिङ गरेको छ । जसमा आयन खान अफ्जल युएईका कप्तान रहेका छन् ।

आयन खान युएईका सिनियर टोलीका प्रमुख सदस्य हुन् । बिहीबार नामिबियालाई एक विकेटले हराउन आयन खानले उत्कृष्ट अलराउन्ड प्रदर्शन गर्दै प्लेयर अफ द म्याच चुनिएका थिए । नामिबियालाई ९१ रनमा अल आउट गर्न आयनले तीन विकेट लिनुको साथै ३५ रनमा अविजित रहँदै रोमान्चक जित दिलाएका थिए ।

१७ वर्षीय अर्थोड्रक्स स्पिनर आयनले ४ ओडिआई खेलमा ८ विकेट लिनुको साथै एक अर्धशतकसहित १ सय १७ रन बनाएका छन् । आयन खानले गत नोभेम्बरमा नेपालविरुद्ध पहिलो ओडिआई खेलमा डेब्यू गर्दै प्लेयर अफ द म्याच चुनिएका थिए ।

आयन खानले पहिलो खेलमै ४ विकेट लिनुको साथै २६ रन बनाएका थिए । तेस्रो खेलमा आयन ५४ रनको यादगार इनिङ खेलेका थिए । आयन नै नेपालविरुद्धको तीन खेलको सिरिजमा सर्वोत्कृष्ट खेलाडी चुनिएका थिए ।

नेपाल र युएईबीचको फागुन १८ (मार्च२) मा सिनियर र यु१९ टोली दुबैको खेल छ । सिनियर टोली आइसिसी विश्वकप लिग २ त्रिकोणात्मक ओडिआई सिरिज अन्तर्गत प्रतिस्पर्धा गर्नेछ । दुबैको सिनियर टोली बाँकी सबै खेलमा जितका साथ शीर्ष तीनमा पर्दै सोझै विश्वकप छनोट खेल्न चाहन्छन् । यो अवस्थामा आयनले सिनियर टोलीबाट खेल्छन् की यू१९ बाट भन्न सक्ने अवस्था छैन ।

६ टोली सहभागी यू१९ एसिया छनोटको विजेताले २०२४ मा श्रीलंकामा हुने यू१९ विश्वकप खेल्न पाउँछन् । नेपाल र युएई उपाधिका प्रमुख दुई दावेदार टोली हुन् ।