काठमाडौं (हाम्रो खेलकुद) – नेपालका शीर्षक्रमका ब्याटर आकाश त्रिपाठीले आइसिसी यू-१९ विश्वकप एसिया क्षेत्र छनोटमा सिंगापुरविरुद्ध अर्धशतक प्रहार गरेका छन् ।

युएईको आजमानमा रहेको इर्डेन गार्डेन ओभलमा टस जितेर पहिला ब्याटिङको रोजेको नेपालले २७ ओभरमा १ विकेट गुमाउँदै १ सय ८ रन बनाएको छ । डेब्यू खेल खेलेका आकाश ८२ बलमा ५ चौका र १ छक्कासहित ५५ रनमा अविजित छन् । युवा ओपनर अर्जुन कुमाल ६६ बलमा ३ चौकासहित ३७ रनमा अविजित छन् ।

दोस्रो विकेटका लागि अर्जुन र आकाशले ९३ रनको साझेदारी गरि सकेका छन् । ओपनर दीपक बोहरा १६ बलमा १ चौकासहित ५ रनमा आउट भए । नेपालले आजको खेलमा नेपाली यू-१९ टोलीमा ७ खेलाडीलाई डेब्यू दिएको छ । दीपक बोहरा, आकाश त्रिपाठी, सुवास भण्डारी, हेमन्त धामी, दीपक डुम्रे, दीपक बोहरा र मिलन बोहराले पहिलो पटक नेपाली यू-१९ टोलीबाट खेलेका छन् । नेपालले पहिलो खेलमा आकाश चन्द, दीपेश कँडेल र उत्तमथापामगरलाई बेन्चमा राखेको छ ।

उपाधिको प्रमुख दाबेदार नेपाल सिंगापुरलाई हराउँदै प्रतियोगितामा सानदार सुरुवात गर्न चाहन्छ । प्रतियोगितामा नेपाल, हङकङ, मलेसिया, सिंगापुर, युएई र कुवेत छन् । सिंगल राउन्ड रोविनको आधारमा हुने प्रतियोगिता विजेताले २०२४ मा श्रीलंकामा हुने यू१९ विश्वकप खेल्न पाउनेछ । नेपाल पनि २०१६ पछि पहिलो पटक विश्वकप खेल्ने सोचमा छ।

नेपालको प्लेइङ ११ : दीपक बोहरा, अर्जुन कुमाल, आकाश त्रिपाठी, देव खनाल, सुवास भण्डारी, विशाल विक्रम केसी, हेमन्त धामी, दीपक प्रसाद डुम्रे, दुर्गेश गुप्ता, दीपक बोहरा र मिलन बोहरा ।