काठमाडौं (हाम्रो खेलकुद)– आइसिसी यू-१९ विश्वकप एसिया क्षेत्र छनोटमा नेपाल सिंगापुरविरुद्ध नेपालले पाँचौं विकेटको रुपमा दीपक बोहरालाई गुमाएको छ । युएईको आजमानमा रहेको इर्डेन गार्डेन ओभलमा टस जितेर पहिला ब्याटिङको रोजेको नेपालले ४२ ओभरमा ५ विकेट गुमाउँदै १ सय ९७ रन बनाएको छ ।

नेपालका विशाल विक्रम केसी २८ बलमा २ छक्कासहित २६ रनमा क्रिजमा अविजित छन् । उनलाई विकेटकिपर दीपक प्रसाद डुम्रेले २ रनमा साथ दिएका छन् । डेब्यू खेल खेलेका दीपक बोहराले १५ बलमा २ चौकासहित १७ रनमा बोल्ड हुन पुगे

नेपाली युवा टोलीलाई ओपनर आकाश त्रिपाठीले १ सय बलमा ७ चौका र १ छक्कासहित ७८ रनमा बनाउँदै राम्रो सुरुवात दिलाएका थिए । लुम्बिनीबाट घरेलु क्रिकेट खेल्ने आकाशको यो अन्तर्राष्ट्रिय उमेर समूहमा पहिलो खेल हो । यस पटकको यू-१९ राष्ट्रिय प्रतियोगितामा आकाश सर्वाधिक रन बनाउनेक्रममा दोस्रो स्थानमा थिए । आकाशले ७ खेलमा २ सय ३७ रन बनाएका थिए ।

कप्तान देव खनाल पनि २६ बलमा १ चौकासहित २१ रनमा आउट भए । देव अभ्युदय छाजेरको बलमा एलबीडब्लू आउट भए । अर्का युवा ओपनर अर्जुन कुमाल ६७ बलमा ३ चौकासहित ३७ रनमा बोल्ड आउट भए । दोस्रो विकेटका लागि अर्जुन र आकाशले ९३ रनको साझेदारी गरेका थिए ।

अर्जुन महियु भाटियाको बलमा बोल्ड आउट हुन पुगेका थिए । ओपनर दीपक बोहरा ५ रनमा आउट भएपनि अर्जुन र आकाशले राम्रो साझेदारी गर्दै उत्कृष्ट सुरुवात दिलाएका थिए ।

नेपाली यू–१९ टोलीमा ७ खेलाडीले डेब्यू गरेका छन् । दीपक बोहरा, आकाश त्रिपाठी, सुवास भण्डारी, हेमन्त धामी, दीपक डुम्रे, दीपक बोहरा र मिलन बोहराले पहिलो पटक नेपाली यू–१९ टोलीबाट खेलेका छन् ।

नेपालले पहिलो खेलमा आकाश चन्द, दीपेश कँडेल र उत्तम थापामगरलाई बेन्चमा राखेको छ । प्रतियोगितामा नेपाल, हङकङ, मलेसिया, सिंगापुर, युएई र कुवेत छन् । सिंगल राउन्ड रोविनको आधारमा हुने प्रतियोगिता विजेताले २०२४ मा श्रीलंकामा हुने यू१९ विश्वकप खेल्न पाउनेछ ।