काठमाडौं (हाम्रो खेलकुद) – नेपालका युवा तीव्र गतिका बलर हेमन्त धामीले आइसिसी यू(१९ विश्वकप एसिया क्षेत्र छनोटमा सिंगापुरविरुद्ध डेब्यू विकेट लिएका छन् । नेपालले प्रस्तुत गरेको २ सय ६२ रनको विजयी लक्ष्य पछ्याएको सिंगापुरले ३ ओभरमा १ विकेट गुमाउँदै ४ रन बनाएको छ ।

हेमन्त धामीले तेस्रो ओभरको तेस्रो बलमा ओपनर राहिल खानलाई आकाश त्रिपाठीबाट शून्यमा क्याच गर्दै डेब्यू विकेट लिएका हुन् । सुदूरपश्चिमबाट घरेलु क्रिकेट खेल्ने हेमन्त नयाँ बलका साथ उत्कृष्ट बलिङ गर्ने गर्दछन् । १० बल खेलेका राहिलले खाता भने खोल्न सकेनन् ।

सिंगापुरको क्रिजमा अर्जुन नागपल ७ बलमा १ रन बनाउँदै खेलेका छन् । उनलाई अभुदयले साथ दिनेछन् । त्यसअघि युएईको आजमानमा रहेको इर्डेन गार्डेन ओभलमा टस जितेर पहिला ब्याटिङको रोजेको नेपालले निर्धारित ५० ओभरमा ७ विकेट गुमाउँदै २ सय ६१ रन बनायो ।

नेपालका मध्यक्रमका ब्याटर विशाल विक्रम केसी ५४ बलमा ४ चौका र २ छक्कासहित ६३ रनमा अविजित रहे । शीर्षक्रमका ब्याटर आकाश त्रिपाठीले १ सय बलमा ७ चौका र १ छक्कासहित ७८ रनमा बनाउँदै राम्रो सुरुवात दिलाउदै आउट भएका थिए । लुम्बिनीबाट घरेलु क्रिकेट खेल्ने यी दुई खेलाडीले नेपालको लागि अर्धशतक प्रहार गरेका थिए ।

सिंगापुरका आर्यविर चौधरीले १० ओभरमा ५३ रन खर्चेर २ विकेट लिए । अभुदय छाजेरले ९ ओभरमा २५ रन खर्चेर २ विकेट लिए । आदित्य भार्गव र महियु भाटियाले एक एक विकेट लिए

प्रतियोगितामा नेपाल, हङकङ, मलेसिया, सिंगापुर, युएई र कुवेत छन् । सिंगल राउन्ड रोविनको आधारमा हुने प्रतियोगिता विजेताले २०२४ मा श्रीलंकामा हुने यू१९ विश्वकप खेल्न पाउनेछ ।