काठमाडौं (हाम्रो खेलकुद) –आइसिसी यू-१९ विश्वकप एसिया क्षेत्र छनोटमा नेपालले प्रस्तुत गरेको बलियो विजयी लक्ष्य पछ्याएको सिंगापुरले रन बनाउन संघर्ष गरेको छ । नेपालले प्रस्तुत गरेको २ सय ६२ रनको विजयी लक्ष्य पछ्याएको सिंगापुरले २४ ओभरमा ३ विकेट गुमाउँदै ५५ रन बनाएको छ ।

सिंगापुरका अभुदय छाजेर ४१ बलमा २ चौकासहित १४ रनमा रिटआर्ट हर्ट भएका छन् । अर्यान मोदी २८ बलमा ८ र सिद्धान्त श्रीकान्त २३ बलमा १ चौकासहित १० रनमा अविजित छन् ।

सिंगापुरका ओपनर अर्जुन नागपल ३५ बलमा २ चौकासहित १४ रनमा रन आउट भए । हेमन्त धामीले तेस्रो ओभरको तेस्रो बलमा ओपनर राहिल खानलाई आकाश त्रिपाठीबाट शून्यमा क्याच गर्दै डेब्यू विकेट लिएका थिए । स्पिनर सुवास भण्डारीले महियु भाटियालाई हेमन्त धामीबाट ३ रनमा क्याच गराउँदै नेपाललाई तेस्रो सफलता दिलाए । स्पिनर सुवास भण्डारीको यो डेब्यू विकेट हो ।

त्यसअघि युएईको आजमानमा रहेको इर्डेन गार्डेन ओभलमा टस जितेर पहिला ब्याटिङको रोजेको नेपालले निर्धारित ५० ओभरमा ७ विकेट गुमाउँदै २ सय ६१ रन बनायो ।

नेपालका मध्यक्रमका ब्याटर विशाल विक्रम केसी ५४ बलमा ४ चौका र २ छक्कासहित ६३ रनमा अविजित रहे । शीर्षक्रमका ब्याटर आकाश त्रिपाठीले १ सय बलमा ७ चौका र १ छक्कासहित सर्वाधिक ७८ रनमा आउट भए ।

सिंगापुरका आर्यविर चौधरीले १० ओभरमा ५३ रन खर्चेर २ विकेट लिए । अभुदय छाजेरले ९ ओभरमा २५ रन खर्चेर २ विकेट लिए । आदित्य भार्गव र महियु भाटियाले एक एक विकेट लिए

प्रतियोगितामा नेपाल, हङकङ, मलेसिया, सिंगापुर, युएई र कुवेत छन् । सिंगल राउन्ड रोविनको आधारमा हुने प्रतियोगिता विजेताले २०२४ मा श्रीलंकामा हुने यू१९ विश्वकप खेल्न पाउनेछ ।