दुबई (हाम्रो खेलकुद) – युवा बायाँ हाते तीव्र गतिका बलर प्रतिश जि.सीले आइसिसी विश्वकप लिग–२ त्रिकोणात्मक ओडिआई सिरिज अन्तर्गत पपुपा न्युगिनीविरुद्ध नेपालको लागि डेब्यू गरेका छन् । दुबई इन्टरनेशल क्रिकेट स्टेडियममा तीव्र गतिका बलर सोमपाल कामीले प्रतिशलाई डेब्यू क्याप दिएका हुन् ।

प्रतिशले तीव्र गतिसँगै तल्लोक्रममा आक्रामक ब्याटिङ गर्ने गर्दछन् । नेपाल टि२० लिगमा प्रतिशले पोखरा एभेन्जर्सबाट खेल्दै उत्कृष्ट प्रदर्शन गरेका थिए । बागमती प्रदेशबाट घरेलु क्रिकेट खेल्ने प्रतिश बायाँ हाते बलर हुन् । प्रतिशले नेपालको यू१९ र यू१६ टोलीबाट खेलि सकेका छन् । प्रतिश पावर प्ले र डेथ ओभर दुबैमा उत्कृष्ट बलिङ गर्दछन् ।

प्रतिश नेपालबाट ओडिआईमा डेब्यू गर्ने ३७ औं खेलाडी हुन् । प्रतिश यस वैकल्पिक खेलाडीको सूचिमा थिए । पछिल्ला दुई सिरिजमा लगातार उनी वैकिल्पक सूचिमा थिए । प्यूठानमा जन्मिएका प्रतिशले घरेलु क्रिकेट भने काठमाडौंबाट खेल्ने गर्दछन् ।

नेपालको यो लिग २ को अन्तिम विदेश भ्रमण हो । नेपाल, युएई र पपुवा न्युगिनीबीच त्रिकोणात्मक ओडिआई सिरिज हुनेछ । यसपछि लिग २ को अन्तिम त्रिकोणात्मक ओडिआई सिरिज नेपालमा यी तीन टोलीबीच प्रतिस्पर्धा हुनेछ। नेपाल लिग २ मा २८ खेलमा १२ मा जित र १४ मा हारसहित २६ अंकका साथ छैटौं स्थानमा छ ।

नेपाललाई शीर्ष पाँचमा रहँदै ओडिआई मान्यता सहजै जोगाउन कम्तिमा ५ खेल जित्नुपर्ने हुन्छ । शीर्ष तीनमा रहँदै आगमी जुन जुलाईमा जिम्बावेमा हुने एकदिवसीय विश्वकप छनोट खेल्न ७ खेल जित्नुपर्ने हुन्छ ।

पपुवा न्युगिनी २८ खेलमा २ मा जित र २५ मा हारसहित ५ अंकका साथ पुछारमा छ । पपुवा न्युगिनीले पुछारमा रहँदै क्वालिफायर प्लेअफ खेल्ने पक्का भई सकेको छ ।