दुबई (हाम्रो खेलकुद)– तीव्र गतिका बलर गुलशन झाले आइसिसी विश्वकप लिग-२ त्रिकोणात्मक ओडिआई सिरिज अन्तर्गत पपुवा न्युगिनीविरुद्ध नेपाललाई दोस्रो सफलता दिलाएका छन् । दुबई क्रिकेट मैदानमा नेपालले टस जितेर पपुवा न्युगिनीलाई ब्याटिङको निम्तो दिएको छ ।

पपुवा न्युगिनीले १६ ओभरमा २ विकेट गुमाउँदै ५२ रन बनाएको छ । पपुवा न्युगिनीका सेसे बाउ ३१ बलमा ११ रनमा अविजित छन् । बाउलाई कप्तान असाद भालाले साथ दिनेछन् । ओपनर किप्लिङ डोरिगालाई २८ रनमा क्याच आउट गराउँदै गुलशनले दोस्रो सफलता दिलाएका छन् ।

तीव्र गतिका बलर गुलशनको १६ औं ओभरको अन्तिम बलमा डोरिगा टप एज लागेर मिडअनमा करण केसीबाट क्याच आउट भए । उनले ५२ बलमा ४ चौका प्रहार गरे । दोस्रो विकेटका लागि डोरिगा र बाउले ५० रनको साझेदारी गरेका थिए ।

नेपाललाई तीव्र गतिका बलर सोमपाल कामीले पहिलो सफलता दिलाएका थिए । सोमपालले पाँचौं ओभरको पहिलो बलमा पपुवा न्युगिनीका आक्रामण ब्याटर टोनी उरालाई २ रनमा बोल्ड आउट गर्दै पहिलो सफलता दिलाएका थिए । उराले १३ बल खेलेका थिए ।

नेपालका करण केसीले ५ ओभरमा २ मेडनसहित ७ रन खर्चेका छन् । सोमपाल कामीले ४ ओभरमा १ मेडनसहित ६ रन खर्चेर १ विकेट लिएका छन् । डेब्यू खेल खेलेका प्रतिश जि।सीले सुरुवाती ४ ओभरमा २३ रन खर्चिएका छन् । गुलशन झाले ४ ओभरमा १७ रन खर्चेर १ विकेट लिएका छन् ।

नेपालको प्लेइङ ११ :

रोहित पौडेल (कप्तान), दीपेन्द्रसिंह ऐरी, ज्ञानेन्द्र मल्ल, आसिफ शेख, करण केसी, सोमपाल कामी, कुशल भुर्तेल, कुशल मल्ल, गुलशन झा, आरिफ शेख र प्रतिश जि.सी. ।