एजेन्सी – भारतीय क्रिकेट टोलीका युवा ब्याटर यशस्वी जैसवालले एकै खेलमा दोहोरो शतक र शतक प्रहार गर्दै अभुतपूर्व प्रदर्शन गरेका छन् । भारतको चर्चित इरानी कपमा जैसवालले रेष्ट अफ इन्डियाबाट मध्य प्रदेशविरुद्ध उक्त प्रदर्शन गरेका हुन् ।

जैसवालले पहिलो इनिङमा २ सय ५९ बलमा ३० चौका र ३ छक्कासहित २ सय १३ रनको सानदार दोहोरो शतकीय इनिङ खेले । उनको उक्त दोहोरो शतकको सहयोगमा रेस्ट अफ इन्डियाले पहिलो इनिङमा ४ सय ८४ रनमा अल आउट भयो । त्यस्तै ओपनर अभिमन्यु इश्वरनले २ सय ४० बलमा १७ चौका र २ छक्कासहित १ सय ५४ रनको शतकीय इनिङ खेले ।

मध्य प्रदेशका आवेश खानले सर्वाधिक चार विकेट लिए । अनुभव अग्रवाल र कुमार कार्तिके सिंहले दुई दुई विकेट लिए । मधेश प्रदेश पहिलो इनिङमा २ सय ९४ रनमा अल आउट भयो ।

मध्य प्रदेशका यश दुवेले २ सय ५८ बलमा १६ चौकासहित सर्वाधिक १ सय ९ रन बनाए । रेस्ट अफ इन्डियाका पुलकित नारङले सर्वाधिक चार विकेट लिए । नवदीप सैनी तीन र मुकेश कुमारले दुई विकेट लिए ।

दोस्रो इनिङमा यशस्वी जैसवाल १ सय ५७ बलमा १६ चौका र ३ छक्कासहित १ सय ४४ रन बनाउँदै आउट भएका छन् । रेस्ट अफ इन्डियाले २ सय ४६ रनमा अल आउट भएको छ । समग्रमा ४ सय ३६ रनको अग्रता लिएको छ ।

इरानी कप भारतको चर्चित घरेलु खेल हो । भारतीय टोलीमा नपरेका उत्कृष्ट खेलाडीले रेस्ट अफ इन्डियाबाट खेल्छन् । रणजी ट्रफीको विजेता टोलीले रेष्ट अफ इन्डियाविरुद्ध खेल्न पाउँछ । मध्य प्रदेश गतवर्ष सिजनको रणजी च्याम्पियन हो । लगातार सानदार प्रदर्शन गर्दै आएका युवा ब्याटर जैसवाललाई भारतीय ब्याटिङको भविष्यको रुपमा हेरिदै आएको छ ।