दुबई(हाम्रो खेलकुद) – घरेलु टोली युनाइटेड अरव इमिरेट्स (युएई_ ले आइसिसी विश्वकप लिग-२ त्रिकोणात्मक ओडिआई सिरिजमा नेपालसँग खेल्नुअघि कप्तान परिवर्तन गरेकोछ । नियमित कप्तान सिपी रिजवानको स्थानमा मोहम्मद वासिमलाई कप्तानी दिएको छ ।

दुबई इन्टरनेशल क्रिकेट स्टेडियममा टसमा वासिम गएका थिए । नेपालका कप्तान रोहित पौडेलले टस जितेर पहिला ब्याटिङ गर्ने निर्णय लिएका छन् । सिपी रिजवानले टस अघि वासिमलाई बधाई दिएका थिए । पपुवा न्युगिनीसँग दुवै खेलमा खराब ब्याटिङ गर्दै १ सय ३१ र पाँच विकेटले पराजित भएपछि युएईले कप्तान परिवर्तन गरेको छ ।

सिपी रिजवान टोलीको प्लेइङ-११ मा भने छन् । पछिल्लो खेलमा युएई पपुवा न्युगिनीसँग ९७ रनमा अल आउट भएको थियो । मध्यक्रमका ब्याटर सिपी रिजवान गत अक्टोबरमा युएईको कप्तानमा नियुक्त भएका थिए । युएईले अहमद राजालाई हटाउँदै सिपीलाई कप्तानी दिएको थियो । उनको प्रदर्शनले कप्तानीमा भने लगातार प्रश्न उठ्दै आएको थियो ।

यता विष्फोटक ओपनर वासिमले पहिलो पटक युएईको कप्तानी अवसर पाएका छन् । पछिल्लो समय युएईबाट वासिमले लगातार उच्च प्रदर्शन गर्दै आएका छन् । अघिल्लो साता दोस्रो टि२० आई खेलमा अफगानिस्तानलाई हराउन वासिमले ९१ रनको उत्कृष्ट इनिङ खेलेका थिए । गतवर्ष आइसिसी टि२० विश्वकप छनोट ए को फाइनलमा आयरल्यान्डलाई हराउन वासिमले ६६ बलमा ७ चौका र ८ छक्कासहित १ सय १२ रनको सानदार शतकीय इनिङ खेलेका थिए ।

वासिमले युएईबाट २६ ओडिआई र २३ टि२० आई खेल खेलेका छन् । पहिलो खेलमा युएईले नेपाललाई ६८ रनले पराजित गरेको थियो । युएई ३१ खेलमा १४ मा जित र १४ मा हारसहित ३१ अंकका साथ पाँचौं स्थानमा छ । युएईलाई शीर्ष तीनमा पर्दै सोझै विश्वकप छनोट खेल्न बाँकी सबै खेल जित्नुपर्ने हुन्छ ।

यस खेलपछि नेपाल र पपुवा न्युगिनीसँग टियुमा दुई दुई खेल खेल्नेछ । शीर्ष पाँचमा रहँदै सोझै ओडिआई मान्यता प्राप्त गर्न बाँकी तीन खेल जित्नुपर्ने हुन्छ ।

युएईले टोलीमा एक परिवर्तन गरेको छ । तीव्र गतिका बलर सबिर अलीको स्थानमा एलिशान शराफुलाई खेलाएको छ । नेपालले चोटबाट बाहिरिएका कुशल भुर्तेलको स्थानमा प्रतिश जि।सीलाई खेलाएको छ । टोलीमा अन्य परिवर्तन भने छैन ।