काठमाडौं (हाम्रो खेलकुद) – नेपाली क्रिकेट टोलीका मध्यक्रमका ब्याटर भीम सार्कीले आइसिसी विश्वकप लिग-२ सिरिज अन्तर्गत घरेलु टोली युएईविरुद्ध दबाब भन्दा पनि आफ्नो लागि एउटा अवसर रहेको बताएका छन् । एक समय ६८-५ को अवस्थामा पुगेको नेपाललाई जिताउन घरेलु टोली युएईविरुद्ध उत्कृष्ट ब्याटिङ गरेका भीमले खेलपछि उक्त प्रतिक्रिया दिएका हुन् ।

दुबई इन्टरनेशनल क्रिकेट स्टेडियममा टस जितेर पहिला ब्याटिङ रोजेको नेपालले निर्धारित ५० ओभरमा ८ विकेट गुमाउँदै २ सय २९ रन बनाएको थियो । नेपालका भीम सार्कीले ९९ बलमा ७ चौकासहित सर्वाधिक ७० रनको महत्वपूर्ण इनिङ खेलेका थिए । एक समय ६८–५ को दयनीय अवस्थामा पुगेको नेपाललाई भीमले सन्दीपसँग छैटौं विकेटका लागि ५६ रनको साझेदारी गरेका थिए ।

‘मानिसक सोच त्यस्तो केहि थिएन । एक बल राम्रो खेल्ने थियो । जति हुन्छ सन्दीप दाइसँग साझेदारी सरले गर्नी भूमिका दिनु भएको थियो । मैले त्यो निभाउने प्रयास गरेको थिएँ’, जितपछि भीम सार्कीले भने । पपुवा न्युगिनीसँग भीम टिकेर खेल्नेक्रममा ३५ बल खेल्दै उनी ८ रनमा आउट भएका थिए । तर युएईसँग अवस्था झन् कठिन थियो । भीम दबाब भन्दा पनि अवसरको रुपमा लिएको बताउँछन् ।

‘त्यो दबाब भन्दा पनि मेरो लागि एउटा अवसर थियो । सरले जुन भूमिका दिनु भएको थियो । त्यो निभाउँछु भनेर म भित्र गएको थिए । सन्दीप दाइसँग खेल्दा र पछि आरिफ दाइसँग पनि साझेदारी हुँदा राम्रो भयो’, उनले भने ।

‘मेरो लागि करिअर सुरुवात हो । बीचमा मैले कति अवसर पाए वा पाएन भन्दा पनि बीचमा मैले जुन प्रयास गर्न सक्थे त्यो गरि राखेको छु । टिममा मौका पाउने नपाउने टिमको सन्तुलनको कुरा हो । जुन बेला मौका पाउँछु त्यसलाई चाहिँ मैले निभाउने प्रयास गर्दछु’, भीमले भने ।

भीमले नेपालबाट ५ ओडिआई खेल खेलेका छन् । भीमले गत वर्ष मार्चमा युएईविरुद्ध दुबईमा नै डेब्यू गरेका थिए । २०१८ मा नै नेपालको टोलीमा परेपनि डेब्यू गर्न चार वर्ष पर्खनु परेको थियो । टोलीमा परेपनि खेल्ने मौका पाएका थिएनन् ।नेपाली मध्यक्रम ब्याटरमा स्थान बनाउन सहज छैन । तीव्र प्रतिस्पर्धा छ ।

त्यसैको कारण भीमले टोलीमा रहेपनि खेल्ने मौका भने पाउन सकेका थिएनन् । भीम टिमले दिएको भूमिका निर्वाह गर्ने बताउँछन् । ‘टिमले मलाई जुन भूमिका दिन्छ फिनिसर, मिडिलअडर वा टप अडरमा । त्यसैलाई निभाउने काम गरेको छु’, उनले भने ।

भीम शीर्ष देखि तल्लोक्रमसम्म खेल्ने क्षमता राख्छन् । घरेलु क्रिकेट त्रिभुवन आर्मीबाट खेल्ने भीमले तल्लो र शीर्षक्रम दुवैमा ब्याटिङ गरेका छन् । भीम जुनसुकै भूमिकामा पनि खेल्न सक्ने क्षमत राख्छन् । ‘त्यसले गर्दा पनि उनलाई फाइदा भएकोछ ।
अभ्यासमा पनि मैले फरक फरक भूमिका तयार पार्छु । राष्ट्रिय टोलीमा परेपछि म यो ठाउँमा खेल्छु भनेर गाह्रो हुन्छ । खेलाडी भएपछि जुन भूमिकामा पनि खेल्न सक्नुपर्छ’, उनले भने ।

भीम रन मात्रै होइन फिल्डिङ मार्फत पनि टोलीलाई जिताउन सक्ने खुवी भएका फिल्डर हुन् । नेपाली क्रिकेटका एक उत्कृष्ट फिल्डरको रुपमा चिनिन्छन् । प्लेइङ ११ मा नभएपनि उनी वैकल्पिक फिल्डरको रुपमा उत्कृष्ट फिल्डिङ गर्दै आएका छन् ।

‘त्यो अव ब्याटरको एक बलको कुरा हो । जति बेला पनि आउट हुन्छ । फिल्डमा छिरेपछि ३ सय बल हुन्छ । त्यसका हरेक बलमा प्रयास हाल्न सकिन्छ । ब्याटिङ त पार्टअफ गेम हो । तर फिल्डिङमा म शतप्रतिशत दिन्छु भन्ने मानसिक सोच हुन्छ’ उनले भने ।

नेपालले अव घरेलु मैदानमा अन्तिम चार खेल खेल्नेछ । नेपाललाई सोझै विश्वकप छनोटमा पुग्न सबै खेल जित्नुपर्ने हुन्छ । शीर्ष पाँचमा रहँदै ओडिआई मान्यता जोगाउन दुई जित पर्याप्त हुनेछ । घरेलु मैदान र समर्थकको नेपालले फाइदा उठाउनेछ ।

‘घरेलु दर्शक भएनन् भने हामीलाई एकदमै गाह्रो हुन्छ । वहाँ पनि आइदिनुहुन्छ । हरेक ठाउँमा आइदिनुहुन्छ । नेपाली दर्शकको कारण नै क्रिकेट चिनेको जस्तो लाग्छ मलाई । एसोसियटको अन्य कुनैपनि देशमा दर्शक हुँदैन । तर नेपालमा जति दर्शक हुन्छन् त्यसले हामीलाई उर्जा मिल्छ । वहाँहरुलाई म हृद्धय देखि एकदमै धन्यावाद भन्न चाहन्छु’, उनले भने ।