एजेन्सी – ओपनर जेसन रोयको विष्फोटक शतकको सहयोगमा क्वेटा ग्ल्याडियटर्सले पाकिस्तान सुपर लिगमा पेशावार जाल्मामाथी ८ विकेटको ऐतिहासिक जित हात पारेको छ । जितको लागि २ सय ४१ रनको विजयी लक्ष्य पछ्याएको क्वेटाले १८.२ ओभरमा २विकेट गुमाउँदै पूरा गर्यो ।

पिएसएल इतिहासमा यो सर्वाधिक ठूलो योगफल पूरा हो । यसअघि गतवर्ष मुल्तान सुल्तानले लाहोर कलन्दर्सविरुद्ध २ सय ७ रनको लक्ष्य पूरा गरेको थियो ।

त्यो नै लक्ष्य पछ्याउँदा पिएसएलमा उच्च योगफल थियो । ग्ल्याडियटर्सलाई जिताउन इंग्लिस ब्याटर जेसन रोयले ६३ बलमा २० चौका र ५ छक्कासहित १ सय ४५ रनमा अविजित रहे । रोयले मात्रै ४४ बलमा शतक प्रहार गरेका थिए । रोय पिएसएलमा एकै इनिङमा सर्वाधिक रन बनाउने ब्याटर हुन् ।

यसअघि कोलिन इनग्रामले २०१९ मा कराँची किंग्सबाट क्वेटा ग्ल्याडियटर्सविरुद्ध १ सय २७ रनको शतकीय इनिङ खेलेका थिए । रोयको यो टि२० कुनैपनि खेलको उच्च प्रदर्शन समेत हो । मार्टिन गुप्टिल २१, विल स्मिड २६ र मोहम्मद हफिजले ४१ रन बनाए ।

त्यसअघि रावलपिन्डी क्रिकेट स्टेडियममा टस जितेर पहिला ब्याटिङ रोजेको जाल्मीले निर्धारित २० ओभरमा २ विकेट गुमाउँदै २ सय ४० रन बनाएको थियो । जाल्मीका कप्तान बाबर आजमले ६५ बलमा १५ चौका र ३ छक्कासहित १ सय १५ रनको सानदार शतकीय इनिङ खेलेपनि टोलीको जितको लागि पर्याप्त हुन सकेन ।

बाबरको पाकिस्तान सुपर लिगमा यो पहिलो शतक हो । अर्का ओपनर २० वर्षीय सैम अयुबले ३४ बलमा ६ चौका र ५ छक्कासहित ७४ रनको उत्कृष्ट इनिङ खेलेका थिए ।

पहिलो विकेटका लागि बाबर आजम र सैम अयुबले १३.३ ओभरमा १ सय ६२ रनको उत्कृष्ट साझेदारी गरेका थिए । रोभम्यान पावेल १८ बलमा ३ चौका र २ छक्कासहित ३५ रनमा अविजित रहेका थिए । ग्ल्याडियटर्सको एकमात्रै विकेट ड्वेन प्रिटोरियसले लिए ।