एजेन्सी – कप्तान टेम्बा बभुमाको सानदार शतकमा घरेलु टोली दक्षिण अफ्रिकाले दोस्रो टेस्ट खेलमा वेस्टइन्डिजविरुद्ध विशाल अग्रता लिएको छ । तेस्रो दिनको खेल सकिँदा दोस्रो इनिङमा दक्षिण अफ्रिकाले ३ सय ५६ रनको विशाल अग्रता लिएको हो । दक्षिण अफ्रिका दोस्रो इनिङमा २८७-७ को अवस्थामा छ।

कप्तान टेम्बा बभुमा २ सय ७५ बलमा २० चौकासहित १ सय ७१ रनमा क्रिजमा छन् । बभुमाको यो टेस्ट करिअरको दोस्रो शतक हो । यो कुनैपनि अन्तर्राष्ट्रिय खेलको उच्च प्रदर्शन समेत हो । उनी बाहेक अन्य ब्याटरले भने राम्रो प्रदर्शन गर्न सकेनन् । ओपनर एडेन माक्ररम १८, डिएन एल्गर ५, टोनी डी जोर्जी १ र वियान मुल्डर ४२ रनमा आउट भए ।

वेस्टइन्डिजका काइल मेयर्स र अल्जारी जोशेफले दुई दुई विकेट लिएका छन् । त्यसअघि पहिलो इनिङमा वेस्टइन्डिज २ सय ५१ रनमा अल आउट भएको थियो ।

वेस्टइन्डिजका जेसन होल्डरले १ सय १७ बलमा ८ चौका र ४ छक्कासहित सर्वाधिक ८१ रनको अविजित इनिङ खेले । अन्य ब्याटरले भने राम्रो प्रदर्शन गर्न सकेनन् । दक्षिण अफ्रिका जेराल्ड कोट्जेले सर्वाधिक तीन विकेट लिए । कागिसो रबाडा र सिमन हरमेरले दुई दुई विकेट लिए ।

घरेलु टोली दक्षिण अफ्रिका पहिलो इनिङमा ३ सय २० रनमा अल आउट भएको थियो । दक्षिण अफ्रिकाका एडेन माक्ररमले १ सय ३९ बलमा १७ चौकासहित सर्वाधिक ९६ रन बनाए । टोनी डी जोर्जीले १ सय ५५ बलमा ८५ रन बनाए ।

वेस्टइन्डिजका काइल मेयर्स, अल्जारी जोशेफ र गुडाकेश मोतीले तीन तीन विकेट लिए । दुई खेलको सिरिजमा दक्षिण अफ्रिकाले १–० को अग्रता लिएको छ ।