एजेन्सी – बायाँ हाते ब्याटर राइली रोसोउको कीर्तिमानी शतकमा मुल्तान सुल्तान्सले पाकिस्तान सुपर लिग (पिएसएल) मा पेशावर जाल्मामाथि चार विकेटको कीर्तिमानी जित हात पारेको छ । जितको लागि २ सय ४३ रनको विजयी लक्ष्य पछ्याएको मुल्तानले १९.१ ओभरमा ६ विकेट गुमाउँदै पूरा गर्यो ।

मुल्तानको जितमा राइली रोसोउले ५१ बलमा १२ चौका र ८ छक्कासहित १ सय २१ रनको सानदार शतकीय इनिङ खेले । उनले ४१ बलमा शतक प्रहार गरेका थिए । जुन पिएसएल इतिहासकै सर्वाधिक छिटो शतक हो । पिएसएलमा यसअघि सर्वाधिक छिटो शतक ४३ बलमा रोसोउले नै २०२० मा क्वेटा ग्ल्याडियर्सविरुद्ध प्रहार गरेका थिए ।

यसै सिजनमा क्वेटाका जेसन रोयले जाल्मीविरुद्ध ४४ बलमा शतक हानेका थिए । यो पिएसएल इतिहासमा पूरा भएको सर्वाधिक ठूलो योगफल हो । यसअघि तीन दिनअघि मात्रै क्वेटाले जाल्मीविरुद्ध नै २ सय ४१ रनको लक्ष्य पूरा गरेको थियो ।

काइरन पोलार्डले २५ बलमा ३ चौका र ५ छक्कासहित ५२ रनको आक्रामक इनिङ खेले । टिम डेविड २, खुशदील शाह १८, अनवार अलीले ८ बलमा २ चौका र २ छक्कासहित २४ रन जोडे । मुल्तानबाट रोसोउको ८, पोलार्डको ५, अलीको २, मोहम्मद रिजवान र उस्मा मिरले एक एक गरि कुल १७ छक्का प्रहार प्रहार गरे ।

जाल्मीका आजमतुल्लाह ओमरजाईले सर्वाधिक दुई विकेट लिए । मुजिब उर रहमान, अर्शद इकबाल, विहाब रियाज, सैम अयुबले एक एक विकेट लिए ।

त्यसअघि रावलपिंडी क्रिकेट स्टेडियममा टस जितेर पहिला ब्याटिङ रोजेको जाल्मीले निर्धारित २० ओभरमा ६ विकेट गुमाउँदै २ सय ४२ रन बनाएपनि बचाउन सकेन । जाल्मीका कप्तान बाबर आजमले ३९ बलमा ९ चौका र २ छक्कासहित ७३ रनको योगदान दिए । अर्का ओपनर सैम अयुबले ३३ बलमा ५ चौका र ४ छक्कासहित ५८ रन जोडे ।

मोहम्मद हरिसले ११ बलमा १ चौका र ४ छक्कासहित ३५ तथा टम काडमोरले १८ बलमा ४ चौका र २ छक्कासहित ३८ रन जोडे । जाल्मीबाट समग्रमा १५ छक्का प्रहार भएको थियो ।

जाल्मी र मुल्तानबाट गरि एकै खेलमा कुल ३२ छक्का प्रहार भए । दुई टोली इनिङको रन कुल ४ सय ८६ बनेको थियो । मुल्तानका अब्बास अफ्रिदीले ४ ओभरमा ३९ रन खर्चेर ४ विकेट लिए ।