काठमाडौं (हाम्रो खेलकुद) – नेपाली क्रिकेट टोलीका पूर्वकप्तान पारस खड्का सम्मिलित एसिया लायन्सले लेजेन्ड्स लिग क्रिकेट मास्टर्सको फाइनलमा आज वर्ल्ड जायन्ट्ससँग खेल्दैछ । खेल नेपाली समय अनुसार बेलुका ८ : १५ मा दोहामा रहेको वेस्टइन्ड पार्क इन्टरनेशल क्रिकेट स्टेडियममा हुनेछ।

आरोन फिन्च कप्तान भएको जायन्ट्स लिगमा शीर्ष स्थानमा रहँदै सोझै फाइनलमा पुगेको हो । एसियाले एलिमिनेटर खेलमा इन्डिया महाराजसलाई हराउँदै फाइनलमा स्थान बनाएको हो । लिगको पहिलो खेलमा एसियाले जायन्ट्सलाई ३५ रनले हराएको थियो । दोस्रो खेलमा २० रनले हराएको थियो ।

पारस खड्काले पाँच मध्य चार खेल खेलेका छन् । दुई खेलमा मात्रै ब्याटिङको अवसर पाएका थिए । भारतविरुद्ध पहिलो खेलमा अन्तिम ओभरका मौका पाउँदा २ बलमा ३ रन जोडेका थिए । जायन्ट्सविरुद्ध १० बलमा ८ रन बनाउँदै रन आउट भएका थिए । पारस टोलीमा रहेपनि ब्याटिङको अवसर पाउन सकेका छैनन् ।

एसियाको टोलीमा ब्याटिङमा गहिराई छ । ओपनरमा उपुल थरंगा र तिलकरत्ने दिलशान छन् । थिसेरा परेरा, मस्बिाह उल हक, मोहम्मद अफिज, शाहिद अफ्रिदी, अस्गर अफगान, अब्दुल रजाकपछि मात्रै पारसले मौका पाउँदै आएका छन् । एसियाको विकेट सुरुवातमा चाँडै गुमेको खण्डमा मात्रै पारसले मौका पाउने देखिन्छ ।

एसियाको टोलीमा शोएब अख्तर, सोहेल तनविर र मोहम्मद आमिर जस्ता बलर छन् । उता जायन्ट्समा क्रिस गेल, आरोन फिन्च, हासिम आमला, शेन वाटसन, ज्याकक्विस कालिस र केभिन ओ ब्रायन जस्ता विश्व चर्चित ब्याटर छन् ।

ब्रेट ली जायन्ट्सका प्रमुख बलर हुन् । पछिल्ला पाँच खेलमा एसियाले दुई पटक मात्रै जायन्ट्सविरुद्ध जित हात पारेको छ ।