एजेन्सी – ओपनर लिटन दासको कीर्तिमानी ब्याटिङमा बंगलादेशले दोस्रो टि२० आई खेलमा आयरल्यान्डलाई २ सय ३ रनको विशाल लक्ष्य दिएको छ । जहुर अहमद चौधरी स्टेडियममा टस हारेर पहिला ब्याटिङको निम्तो पाएको बंगलादेशले निर्धारित १७ ओभरमा ३ विकेट गुमाउँदै २ सय २ रन बनायो ।

वर्षाको कारण खेल सुरु हुन ढिलो हुँदा ३ ओभर खेल घटेको थियो । बंगलादेशका ओपनर लिटन दासले ४१ बलमा १० चौका र ३ छक्कासहित सर्वाधिक ८३ रनको योगदान दिए । दासले १८ बलमा अर्धशतक पूरा गरेका थिए । कुनैपनि बंगलादेशका ब्याटरले टि२० आईमा सर्वाधिक छिटो बलमा अर्धशतक पूरा गरेका हुन् ।

उनले १६ वर्षअघि मोहम्मद अशरफुलले दक्षिण अफ्रिकामा भएको टि२० विश्वकपमा वेस्टइन्डिजविरुद्ध २० बलमा प्रहार गरेको अर्धशतकको कीर्तिमान तोडेका हुन् । गतवर्ष टि२० विश्वकपमा भारतविरुद्ध दासले २१ बलमा अर्धशतक प्रहार गरेका थिए ।
पहिलो विकेटका लागि लिटन दास र रोनी तालुकदारले ९.२ ओभरमा १ सय २४ रनको विष्फोटक शतकीय साझेदारी गरेका थिए ।

बंगलादेशबाट टि२० आईमा भएको कुनैपनि विकेटका लागि भएको यो दोस्रो उच्च र ओपनरको सर्वाधिक ठूलो साझेदारी हो ।
यसअघि दोस्रो विकेटका लागि तमिम इकबाल र महमुदूल्लाह रियादले वेस्टइन्डिजविरुद्ध २०१२ मा १ सय ३२ रनको शतकीय साझेदारी गरेका थिए । ओपनरको रुपमा उच्च साझेदारी यसअघि मोहम्मद नइम र सौम्य सरकारले जिम्बावेविरुद्ध २०२१ मा १ सय २ रनको शतकीय साझेदारी गरेका थिए ।

बंगलादेशले ७.१ ओभरमै १ सय रन पूरा गरेको थियो । कप्तान सकिब अल हसन २४ बलमा ३ चौका र २ छक्कासहित ३८ रनमा अविजित रहे । तौहिद हृदोय १३ बलमा ३ चौका र १ छक्कासहित २४ रनमा आउट भए ।

आयरल्यान्डका स्पिनर बेन्जामिन ह्वाइटले ४ ओभरमा २८ रन खर्चेर २ विकेट लिए । मार्क आदिरले ४ ओभरमा ५२ रन खर्चेर १ विकेट लिए ।