एजेन्सी – कप्तान सकिब अल हसन र ओपनर लिटन दासको सानदार प्रदर्शनमा बंगलादेशले दोस्रो टि२० आई खेलमा आयरल्यान्डलाई ७७ रनले हराउँदै एक खेल अगावै सिरिज जितेको छ।

जितको लागि २ सय ३ रनको विशाल विजयी लक्ष्य पछ्याएको आयरल्यान्डले निर्धारित १७ ओभरमा ९ विकेट गुमाउँदै १ सय २५ रन बनायो । आयरल्यान्डका मध्यक्रमका ब्याटर कर्टिस क्याम्फरले ३० बलमा ३ चौका र ३ छक्कासहित सर्वाधिक ५० रन बनाए । अन्य कुनैपनि आयरल्यान्डका खेलाडीले राम्रो प्रदर्शन गर्न सकेनन् ।

लज्जास्पद ब्याटिङ गर्नेक्रममा आयरल्यान्डका ८ खेलाडीले दोहोरो अंकमा रन बनाउन सकेनन् । ह्यारी टेक्टर २२ र ग्राह हुमेले २० रन जोडे । बंगलादेशका सकिब अल हसनले ४ ओभरमा २२ रन खर्चेर ५ विकेट लिए । तीव्र गतिका बलर तस्किन अहमदले ४ ओभरमा २७ रन खर्चेर ३ विकेट लिए ।

त्यसअघि जहुर अहमद चौधरी स्टेडियममा टस हारेर पहिला ब्याटिङको निम्तो पाएको बंगलादेशले निर्धारित १७ ओभरमा ३ विकेट गुमाउँदै २ सय २ रन बनाएको थियो । वर्षाको कारण खेल सुरु हुन ढिलो हुँदा ३ ओभर खेल घटेको थियो । बंगलादेशको जितमा ओपनर लिटन दासले ४१ बलमा १० चौका र ३ छक्कासहित सर्वाधिक ८३ रनको योगदान दिए ।

दासले १८ बलमा अर्धशतक पूरा गरेका थिए । उनी बंगलादेशबाट सर्वाधिक छिटो अर्धशतक पूरा गर्ने खेलाडी बनेका छन् । उनले २००७ मा मोहम्मद शरिफुलले वेस्टइन्डिजविरुद्ध २० बलको कीर्तिमान तोडेका हुन् ।

पहिलो विकेटका लागि लिटन दास र रोनी तालुकदारले ९.२ ओभरमा १ सय २४ रनको विष्फोटक शतकीय साझेदारी गरेका थिए । बंगलादेशबाट टि२० आईमा ओपनरले गरेको उच्च साझेदारी हो । मोहम्मद नइम र सौम्य सरकारले जिम्बावेविरुद्ध २०२१ मा १ सय २ रनको शतकीय साझेदारी गरेका थिए ।

कप्तान सकिब अल हसन २४ बलमा ३ चौका र २ छक्कासहित ३८ रनमा अविजित रहे । तौहिद हृदोय १३ बलमा ३ चौका र १ छक्कासहित २४ रनमा आउट भए ।

आयरल्यान्डका स्पिनर बेन्जामिन ह्वाइटले ४ ओभरमा २८ रन खर्चेर २ विकेट लिए । मार्क आदिरले ४ ओभरमा ५२ रन खर्चेर १ विकेट लिए । पहिलो खेलमा बंगलादेश २२ रनले विजयी भएको थियो । तेस्रो खेल शुक्रबार हुनेछ ।