काठमाडौं (हाम्रो खेलकुद) – राष्ट्रिय क्रिकेट टोलीका पूर्व कप्तान समेत रहेका ज्ञानेन्द्र मल्लसहित आफ्नो कलेजमा अध्ययनरत ५ क्रिकेटरलाई फिनिक्स अलेज अफ म्यानेजमेन्टले बिहीबार नगदसहित सम्मान गरेको छ ।
विश्व कप ग्लोबल छनोटमा पुर्याउन सफल टोलीका सदस्य ज्ञानेन्द्र, कुशल भुर्तेलसहित कमलसिंह ऐरी, सन्दीप जोरा र सूर्य तामाङलाई फिनिक्सले सम्मान गरेको हो । उनीहरुलाई जनही ५० हजार रुपैयाँसहित सम्मान गरिएको थियो । फिनिक्सका ब्रान्ड एम्बेसडर रहेका क्रिकेट टोलीका पूर्व कप्तान पारस खड्का, फिनिक्सका प्राचार्य फत्तबहादुर केसी, फिनिक्सका कार्यकारी निर्देशक लक्ष्मण पोख्रेलले खेलाडीलाई सम्मान गरेका थिए ।
पाँचै जना फिनिक्समा स्नातकमा अध्ययनरत रहेको जानकारी गरायो । क्रिकेटका माध्यमबाट उल्लेखनीय उपलब्धि तथा योगदान पुर्याएका कारण आफ्ना विधार्थीसमेत रहेका खेलाडीलाई सम्मान गरिएको फिनिक्सका प्राचार्य केसीले बताए ।
पूर्व कप्तान खड्काले खेलकुदसँगै अध्ययन पनि खेलाडीका लागि आवश्यक रहेको उल्लेख गर्दै भने,‘ मैले पनि यहि कलेजबाट स्नात्तकोत्तर गरे । अहिलेको खेलाडीले खेल र अध्ययनलाई सन्तुलन गरिरहेका छन् । अध्ययन सबैका लागि जरुरी छ।’
कार्यकारी निर्देशक श्री लक्ष्मण पोख्रेलले राष्ट्रिय क्रिकेट खेलाडीहरूलाई उच्च शिक्षा हासिल गर्न उत्प्रेरित गर्न शतप्रतिशत छात्रवृत्ति उपलब्ध गराएको जानकारी दिए । मैतीदेवी, काठमाडौंमा अवस्थित फिनिक्स कलेज अफ म्यानेजमेन्ट सन् २०१२ देखि नेपालमा स्नातक र स्नातकोत्तर तहका व्यवस्थापन, कम्प्युटर विज्ञान र सूचना प्रविधि संकायका कार्यक्रमहरू सञ्चालन गर्ने पहिलो लिंकन विश्वविद्यालयसँग संबन्धन प्राप्त कलेज हो ।
सम्मानितहरुका तर्फबाट बोल्दै ज्ञानेन्द्रले कलेजलाई धन्यवाद दिए । उनले अध्ययनका लागि उमेर बाधक नहुने सल्लाहबाट आफू पनि फिनिक्सका स्तातकमा अध्ययन गरिरहेको जानकारी दिए ।
