एजेन्सी – मध्यक्रमका ब्याटर पर्गत सिंहको शतकमा क्यानडाले आइसिसी विश्वकप क्वालिफायर प्लेअफमा युएईलाई २ सय ५५ रनको प्रतिस्पर्धात्मक लक्ष्य दिएको छ । विन्डहोकमा टस जितेर पहिला ब्याटिङ रोजेको क्यानडा ४८.५ ओभरमा २ सय ५४ रनमा अल आउट भयो ।

क्यानडाका पर्गत सिंहले ९६ बलमा १३ चौका र २ छक्कासहित १ सय २ रनको शतकीय इनिङ खेले । निकोलस किर्टोनले ६४ बलमा १ चौकासहित ५० रन जोडे । सिंह भारतीय मुलका खेलाडी हुन् । उनले २०१६ सम्म भारतीय रणजी ट्रर्फी लगायतका अन्य घरेलु प्रतियोगिता खेलेका थिए । पन्जाबबाट घरेलु क्रिकेटमा राम्रो गर्न नसकेपछि उनी क्यानडातर्फ लागेका थिए ।

पन्जाबको रोपरमा जन्मिएका सिंहले गत वर्षदेखि क्यानडाको सिनियर टोलीबाट क्रिकेट खेल्दै आएका छन् । गतवर्ष उनले सिंगापुरविरुद्ध ८३ र ओमानविरुद्ध ८७ रन जोडेका थिए । उनी क्यानडाबाट ओडिआईमा शतक हान्ने छैटौं खेलाडी हुन् ।
क्यानडाले ओपनर आरोन जोनसनलाई ४ रनमै गुमाएको थियो । तर दोस्रो विकेटका लागि अष्टेलियन मुलका म्याथु स्पोर्स र सिंहले ९४ रनको साझेदारी गरेका थिए । स्पोर्स ६२ बलमा २ चौका र २ छक्कासहित ३३ रनमा आउट भए ।

तेस्रो विकेटका लागि पर्गत र निकोलसले ६८ रनको साझेदारी गरेका थिए । एक समय क्यानडा ३९.४ ओभरमा २१४-३ को बलियो अवास्थामा थियो । विजयरत्ने श्रीमन्थे २३ बलमा १ चौका र १ छक्कासहित २८ रनमा आउट भए । त्यसपछिका साद बिन जाफरले १४ रन बनाउन बाहेक अन्यले दोहोरो अंकमा रन बनाउन सकेनन् ।

युएईका आयन खानले ७ ओभरमा १ मेडनसहित ३४ रन खर्चेर ३ विकेट लिए । जहुर खान र जुनैद सिद्दिकले दुई दुई विकेट लिए । ओडिआई मान्यता पाउन दुबै टोलीलाई यो खेल जित्नैपर्ने दबाब छ ।