एजेन्सी – कप्तान फाफ डु प्लेसिस र विराट कोहलीको उत्कृष्ट ब्याटिङको सहयोगमा रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२३ मा मुम्बई इन्डियन्सलाई ८ विकेटले हराउँदै सानदार विजयी सुरुवात गरेको छ ।

जितको लागि १ सय ७२ रनको विजयी लक्ष्य पछ्याएको बेंगलोरले १६.२ ओभरमा २ विकेट गुमाउँदै पूरा गर्यो । बेंगलोरको जितमा विराट कोहली ४९ बलमा ६ चौका र ५ छक्कासहित ८२ रनमा अविजित रहे । फाफ डु प्लेसिस ४३ बलमा ५ चौका र ६ छक्कासहित ७३ रनमा आउट भए ।

पहिलो विकेटका लागि कोहली र डु प्लेसिसले १४.५ ओभरमा १ सय ४८ रनको सानदार शतकीय साझेदारीका साथ जितको आधार तय गरेका थिए । डु प्लेसिस अर्शद खानको बलमा ठूलो सट खेल्ने धुनमा टिम डेविडबाट लङअनमा क्याच आउट भएका थिए ।

दीनेश कार्तिक डक आउट भए । ग्लेन म्याक्सवेल ३ बलमा २ छक्कासहित १२ रनमा अविजित रहे ।मुम्बईका क्यारन ग्रीन र अर्शद खानले एक एक विकेट लिए ।

त्यसअघि चिन्नास्वामी रंगाशालामा टस हारेर पहिला ब्याटिङको निम्तो पाएको मुम्बईले निर्धारित २० ओभरमा ७ विकेट गुमाउँदै १ सय ७१ रन बनाएको थियो ।

उक्त योगफल जितको लागि पर्याप्त हुने सकेन । मुम्बईका बायाँ हाते अलराउन्डर तिलक बर्मा ४६ बलमा ९ चौका र ४ छक्कासहित ८४ रनमा अविजित रहेपनि टोलीको हार टार्न सकेनन् । एक समय १०५-६ को दयनीय अवस्थामा पुगेको मुम्बईलाई तिलकले सानदार प्रदर्शनका साथ खेलमा आशा कायमै राखेका थिए ।

तिलक बाहेक अन्य कुनैपनि मुम्बईका ब्याटरले राम्रो प्रदर्शन गर्न सकेनन् । मुम्बईको सुरुवात र प्रमुख ब्याटरकै प्रदर्शन निकै खराब रह्यो । तीव्र गतिका बलर मोहम्मद शिराजले तेस्रो ओभरको तेस्रो बलमा ओपनर ईशान किशनलाई १० रनमा क्याच गराए । कप्तान रोहित शर्मा १० बल खेल्दै एक रनमा आउट भए । रोहित आकाश दीपको बलमा आउट साइड एज लागेर विकेटकिपर दीनेश कार्तिकबाट क्याच आउट भएका थिए ।

क्यामरन ग्रीनलाई रिस टोप्लीले ५ रनमा बोल्ड गरे । माइकल ब्रेसवेलको बलमा सूर्यकुमार यादव १५ रनमा क्याच आउट भएपछि मुम्बई ८.५ ओभरमा ४८-४ को दयनीय अवस्थामा पुगेको थियो । पाँचौं विकेटका लागि तिलक र डेब्यू खेल खेलेका नेहल वढेराले ३० बलमा ५० रनको साझेदारी गर्दै खेलमा फर्काएका थिए ।

स्पिनर कर्ण शर्माको १४ औं ओभरको पाँचौं बलमा लगातार तीन छक्का हान्ने धुनमा वढेरा लङअनमा विराट कोहलीबाट क्याच आउट भए । उनले १३ बलमा १ चौका र २ छक्कासहित २१ रन बनाए । टिम डेविड शर्माको बलमै ४ रनमा बोल्ड हुँदा मुम्बई १५.३ ओभरमा १०५-६ को दयनीय अवस्थामा पुगेको थियो ।

बेंगलोरका कर्ण शर्माले ४ ओभरमा ३२ रन खर्चेर २ विकेट लिए । मोहम्मद शिराज, रिस टोप्ली, आकाश दीप, हर्षल पटेल र माइकल ब्रेसवेलले एक एक विकेट लिए । बेंगलोरले बिहीबार कोलकाता नाइट राइडर्ससँग खेल्नेछ । मुम्बईले शनिबार चेन्नई सुपर किंग्ससँग खेल्नेछ ।