काठमाडौं (हाम्रो खेलकुद) – नेपालले एसिसी इस्ट जोन कपको सेमिफाइनल खेलमा सिंगापुरसँग खेल्ने भएको छ । सिंगापुर अन्तिम खेलमा हङकङसँग ७ विकेटले पराजित भएपछि नेपालसँग सेमिफाइनल खेल्ने पक्का भएको हो ।

नेपाल समूह ए को विजेता र सिंगापुर समूह बी को उपविजेताको रुपमा सेमिफाइनल खेल्नेछन् । सेमिफाइनल सोमबार हुनेछ । अर्को सेमिफाइनल खेलमा मलेसिया र हङकङबीच प्रतिस्पर्धा हुनेछ । मलेसिया समूह ए को उपविजेता र हङकङ समूह बीको विजेताको रुपमा सेमिफाइनलमा प्रतिस्पर्धा गर्नेछन् ।

फाइनल र तेस्रो स्थानको लागि मंगलबार प्रतिस्पर्धा हुनेछ । नेपालले पहिलो खेलमा थाईल्यान्डलाई २ सय २५ रन र मलेसियालाई ८४ रनले हराउँदै समूह ए को विजेता बनेको थियो । उता सिंगापुरले माल्दिभ्सलाई २ सय ४५ र इन्डोनएसियालाई १ सय ४ रनले हराएको थियो । हङकङसँग सिंगापुर ७ विकेटले पराजित हुन पुग्यो ।

जितको लागि २ सय ८ रनको विजयी लक्ष्य पछ्याएको हङकङले ३४.३ ओभरमा ३ विकेट गुमाउँदै पूरा गर्यो । हङकङलाई जितको लागि अन्तिम १२ बलमा ३२ रन चाहिँएको थियो । तर तीन बल अगाडिनै पूरा गरेको थियो । अन्तिम नौं बलमा चार छक्का र दुई चौकाका साथ रोमान्चक जित हात पारेको हो ।

हङकङका कप्तान ६० बलमा ४ चौका र ६ छक्कासहित ९४ रनमा नट आउट रहे । त्यसअघि टस जितेर पहिला ब्याटिङ रोजेको सिंगापुरले निर्धारित ३५ ओभरमा ९ विकेट गुमाउँदै २ सय ७ रन बनाएको थियो । सिंगापुरका श्रेयान चौले ७९ बलमा १२ चौका र १ छक्कासहित ७८ रन बनाएपनि टोलीको हार टार्न सकेनन् ।