काठमाडौं (हाम्रो खेलकुद) – युवा लेगस्पिनर खुशी डंगोलले नेपाली महिला क्रिकेट टोलीमा डेब्यू गरेकी छिन् । खुशीले चार देश सम्मिलित महिला टि२० आई सिरिज अन्तर्गत दोस्रो खेलमा आज कुवेतविरुद्ध डेब्यू गरेकी हुन् ।

मलेसियाको बायोमास ओभलमा कुवेतले टस जितेर पाहिला फिल्डिङ गर्ने निर्णय लिएको छ । नेपालले केहि समयमा ब्याटिङ गर्दैछ ।

बागमती प्रदेशबाट घरेलु क्रिकेट खेल्ने खुशीलाई नेपालले डेब्यू दिएको छ । उनले सीता रानामगरसँग स्पिन आक्रामण सम्हाल्ने छिन् । नेपालले टोलीमा दुई परिवर्तन गरेको छ । त्यस्तै बायाँ हाते तीव्र गतिकी बलर ईश्वरी विष्टलाई पनि मौका दिएको छ । कुवेत तुलनात्मक रुपमा कमजोर हुँदा नेपालले परिवर्तन गरेको हुनसक्छ । नेपालले पहिलो खेलबाट तीव्र गतिकी बलर अश्मिना कर्माचार्य र अप्सरी बेगमलाई भने बेन्चमा राखेको छ ।

मलेसिया भ्रमणमा नेपालबाट तीन अनक्याप्ड खेलाडी गएका थिए । पहिलो खेलमा हङकङविरुद्ध पुजा महतोले डेब्यू गरेकी थिइन् । अव नेपाली टोलीमा डेब्यू गर्न विकेटकिपर रुवि पोदार बाँकी छिन् ।

नेपालले पहिलो खेलमा हङकङलाई ६ विकेटले हराएको थियो । नेपाल आजको खेलमा विजयी हुँदा फाइनल यात्रापक्का पक्की जस्तै हुनेछ । कुवेत पहिलो खेलमा मलेसियासँग ८ विकेटले पराजित भएको थियो । पहिलो खेलमा हङकङलाई हराउन स्पिनर सीता रानामगरले पाँच विकेट लिएकी थिइन् ।

नेपालको समूहमा युएई, कतार, मलेसिया, भुटान र बहराइन छन् । समूह बी मा चीन, हङकङ, कुवेत, म्यानमार र थाईल्यान्ड छन् । शीर्ष दुई टोली सेमिफाइनल खेल्नेछन् ।

नेपालको प्लेइङ ११ :

रुविना क्षेत्री (कप्तान), सीता रानामगर, इन्दु बर्मा, विन्दु रावल, कविता कुँवर, कविता जोशी, पुजा महतो, सम्झना खड्का, ईश्वरी विष्ट, काजोल श्रेष्ठ र खुशी डंगोल ।