काठमाडौं (हाम्रो खेलकुद) – नेपाली क्रिकेट टोलीका कप्तान रोहित पौडेलले २०२४ मा अमेरिका र वेस्टइन्डिजमा हुने टि२० विश्वकप खेल्नेमा आफूलाई विश्वास रहेको बताएका छन् । दुई सातापछि चीनमा हुने १९ औं एसियाली खेलकुदको तयारीमा रहेका रोहितले हाम्रो खेलकुदसँगको कुराकानीमा उक्त जवाफ दिएका हुन् ।

‘टि२० विश्वकप खेल्नेमा म एकदमै विश्वस्त छु । टिममाथि एकदमै विश्वास पनि छ । जुन हिसाबले हामीले क्रिकेट खेलेका छौं । मलाई महसुस हुन्छ हामी विश्वकपमा छनोट हुन्छौं । त्यहिँ हो केहि कुरालाई पनि कमजोर लिनु भएन । विपक्षी जस्तो भएपनि हामीले आफ्नो उत्कृष्ट क्रिकेट खेल्नु पर्यो’, रोहितले भने ।

त्यसैमा थपे, ‘हामी पछिल्लो समय एसिया कपमा छनोट भएका थियौैं । सबै सफलता भुलेर अव ध्यान टि२० छनोटमा गर्नुपर्छ । टि२० विश्वकप हाम्रो लक्ष्य हो ।’

नेपालले विश्वकपमा स्थान बनाउन आगमी महिना घरेलु मैदानमा हुने आइसिसी टि२० विश्वकप एसिया क्षेत्र छनोटको फाइनलमा स्थान बनाउनुपर्छ । अक्टोबर ३० देखी नोभेक्बर ९ सम्म हुने उक्त छनोटमा फाइनलमा पुग्ने दुई टोलीले विश्वकप खेल्नेछन् ।

आइसिसी टि२० विश्वकप एसिया क्षेत्र छनोटमा आयोजक नेपाल, मलेसिया, युएई, हङकङ, ओमान, बहराइन, सिंगापुर र एसिया क्षेत्री छनोट ए बाट आउने एक टोली हुनेछन् । एसिया क्षेत्रीय छनोट ए आगमी सेप्टेम्बरमा कतारमा हुनेछ । उक्त छनोटमा कतार, कुवेत, माल्दिभ्स र साउदी अरेविया छन् । विजेता टोली विश्वकप छनोट खेल्न नेपाल आउने छ ।

रोहित एसियन खेलकुद पनि एक हिसाबले टि२० विश्वकप छनोटको तयारी रहेको बताए । ‘अव एसियन खेलकुद पनि एक हिसाबले तयारी नै भयो । एसियन गेम्सपछि पनि क्याम्प हुन्छ । कहाँ जाने भनेर कुरा भई राखेको छ । हाम्रो घरेलु मैदानमा हुँदैछ । तर टि२० हुँदा जे पनि हुनसक्छ । हाबी सबै तयार भएर बस्नुपर्छ । विश्वकपमा पुग्न हामीले ध्यान दिएका छौं’, उनले भने ।

नेपालले विश्वकप छनोटअघि टेस्ट टोलीसँग सिरिज खेल्ने चर्चा छ । तर रोहितले आफूलाई हालसम्म थाहा नभएको जानकारी दिए । ‘यसको बारेमा मलाई अहिलेसम्म केहि थाहा छैन । तर खेल्न पाएमा एकदमै राम्रो हुन्छ । ठूलो टोलीहरुसँग खेल्यो भने एसोसिएट टोलीहरुसँग त्यस्तो लाग्दैन । खेल्न पायो भने हाम्रो मनोबल बढ्छ । राम्रो विपक्षीहरुसँग खेल्न पायो भने खेलपनि सुधार हुन्छ । राम्रो टोलीहरुसँग खेल्न पाइन्छ भनेर आशाबादी छु’, रोहितले भने ।

रोहितको पूरा भिडियो हेर्नुहोस् :