काठमाडौं – नेपालले आइसिसी टि२० विश्वकप एसिया क्षेत्र फाइनल छनोटमा समूह ए को अन्तिम खेलमा बिहीबार ओमानसँग खेल्दैछ । खेल नेपाली समय अनुसार बिहान ९ बजे टियु क्रिकेट मैदानमा सुरु हुनेछ । यस खेलको विजेता समूह ए को पनि विजेता बन्नेछ ।

त्यसैले यस खेललाई महत्वपूर्ण साथ हेरिएको छ । टि२० आईमा नेपाल र ओमानबीच चार खेल भएको छ । जसमा नेपाल तीन र ओमान एक खेलमा विजयी भएको छ ।

नेपालले ओमानसँग २०१९ मा चार देश सम्मिलित सिरिज हारेको थियो । नेपाल ६४ रनमा अल आउट हुँदै ६ विकेटले खेल गुमाएको थियो । नेपालले २०२२ मा ओमानसँग तीन खेल खेलेको थियो । तीनै खेलमा नेपालले ओमानलाई सहजै हराएको थियो । नेपालले सिरिजमा घरेलु टोली ओमानलाई ६ विकेटले हराएको थियो ।

ग्लोबल टि२० विश्वकप छनोट ए मा समूह चरणमा ३९ रन र तेस्रो स्थानको लागि भएको खेलमा ९ विकेटले हराएको थियो । त्यसपछि नेपाल र ओमानले टि२० आई खेल खेलेका छैनन् ।

जारी प्रतियोगितामा नेपालले सिंगापुरलाई ८ विकेट र मलेसियालाई ६ विकेटले हराएको थियो । ओमानले भने मलेसियालाई ३२ र सिंगापुरलाई २२ रनले हराएको थियो । नेपालका कुशल मल्ल र ओमानका अकिब इल्यास खेलमा प्रभाव पार्नसक्ने खेलाडी हुन् ।