काठमाडौं (हाम्रो खेलकुद) – प्रधानमन्त्री कप महिला टि२० राष्ट्रिय प्रतियोगिता २०८० मा सुदूरपश्चिमकी ऋतु कनौजिया सर्वाधिक अनुभवी र गण्डकी प्रदेशकी कुसुम गोदार कान्छी कप्तान हुन् । पिएम कप खेल्ने सबै ८ टोलीले कप्तान र टोली घोषणा गरेका छन् ।

ऋतु पिएमकप खेल्ने र कप्तानी गर्ने सर्वाधिक अनुभवी खेलाडी हुन् । ४१ वर्षीय ऋतुले सुदूरपश्चिमको टोलीबाट उत्कृष्ट अलराउन्ड प्रदर्शन गर्दै आएकी छिन् । ऋतुले मध्यक्रममा ब्याटिङसँगै स्पिन बलिङ गर्ने गर्दछिन् ।

२००७ देखी २०१७ सम्म ऋतुले नेपाली टोलीबाट खेलेकी थिइन् । नेपालकी पूर्व–कप्तान समेत रहेकी ऋतु आइसिसी टि२० विश्वकप २०१७ एसिया क्षेत्र छनोट थाईल्यान्डपछि टोलीमा छैनिन् । तर घरेलु क्रिकेटमा भने लगातार राम्रो प्रदर्शन गर्दै आएकी छिन् ।

उता गण्डकी प्रदेशबाट कुसुमले पहिलो पटक कप्तानी गर्दैछिन् । १६ वर्षीय कुसुम तीव्र गतिकी बलिङ अलराउन्डर हुन् । २०२१ देखी गण्डकीको टोलीबाट पिएमकप खेल्दै आएकी छिन् ।

कुसुम र ऋतुको उमेर अन्तर २५ वर्षको फरक छ । कुसुमपछि पिएम कपमा कम उमेरमा कप्तानी कर्णालीकी किरण कुमारी कुँवर छिन् ।

१७ वर्षीय युवा ब्याटर किरणले २०२२ मा नेपालबाट यू१९ विश्वकप छनोट खेलेकी थिइन् । उता ऋतुपछि अनुभवी कप्तान नेपाल एपिएफ क्लबकी सीता राना मगर छिन् । ३१ वर्षीय सीताले घरेलु र राष्ट्रिय दुबै टोलीबाट अलराउन्ड प्रदर्शन गर्दै आएकी छिन् ।

पिएमकप खेल्ने सबै ८ टोलीका कप्तान र उमेर यस प्रकार छ ।

रुविना क्षेत्री (कोशी) – ३० वर्ष २४ दिन

कविता गौतम (मधेश ) – ३० वर्ष ८२ दिन

अश्मिना कर्माचार्य (बागमती) – २३ वर्ष २ सय ३६ दिन

कुसुम गोदार (गण्डकी ) – १६ वर्ष १ सय ९४ दिन

सरस्वती जिएम (लुम्बिनी) – १८ वर्ष ३ सय ४७ दिन

किरण कुमारी कुँवर (कर्णाली) – १७ वर्ष ३ सय ३० दिन

ऋतु कनौजिया (सुदूरपश्चिम) – ४१ वर्ष ९० दिन

सीता रानामगर (नेपाल एपिएफ क्लब ) – ३१ वर्ष २ सय ९० दिन