काठमाडौं (हाम्रो खेलकुद) – नेपाल आर्मी क्लबले प्रो क्लब टि२० च्याम्पियनसिपमा नेपाल पुलिस क्लबलाई ८ विकेटले हराउँदै विजयी सुरुवात गरेको छ । जितको लागि ५९ रनको विजयी लक्ष्य पछ्याएको आर्मीले ६.१ ओभरमा २ विकेट गुमाउँदै पूरा गर्यो । आर्मीको जितमा रोहित पौडेल १४ बलमा १ चौका र २ छक्कासहित २१ रनमा नट आउट रहे ।

विनोद भण्डारी ११ बलमा १ छक्कासहित १४ रनमा नट आउट रहे । ओपनर सन्तोष कार्की ११ बलमा १ चौका र २ छक्कासहित २० र कुशल मल्ल २ रनमा आउट भए । पुलिसका लागि एकमात्रै विकेट ललितनारायण राजवंशीले १ विकेट लिए ।

त्यसअघि नारायणी क्रिकेट मैदान बिरगंजमा टस हारेर पहिला ब्याटिङको निम्तो पाएको पुलिस १८.४ ओभरमा ५८ रनमा अल आउट भएको थियो । पुलिसको लागि करण केसीले १६ बलमा १ छक्कासहित सर्वाधिक १५ रन बनाएका थिए ।

अमृत श्रेष्ठले ३० बलमा ११ रन बनाए । पुलिसका ९ खेलाडीले दोहोरो अंकमा रन बनाउन सकेनन् । ओपनर दीलिप नाथ १, शंकर राना शून्य, अर्जुन साउद २६ बलमा ६, आरिफ शेख ३, शेर मल्ल ४, सुनिल धमला २ र राशिद खान शून्यमा आउट भए ।

आर्मीका साहब आलमले ४ ओभरमा २ मेडनसहित ४ रन खर्चेर ३ विकेट लिए । बसिर अहमदले ४ ओभरमा १२ रन खर्चेर २ विकेट लिए । सोमपाल कामी, अभिनाश कर्ण र कुशल मल्लले १-१ विकेट लिए ।

पहिलो खेलमा सन्दीप लामिछाने कप्तान पर्सा क्रिकेट क्लबले भारतको उत्तरप्रदेश क्लब ११ लाई १ विकेटले हराएको थियो । प्रतियोगितामा नेपालका तीन विभागी टोली, पर्सा र भारतका दुई क्लब टोली छन् ।