काठमाडौं (हाम्रो खेलकुद) – लेगस्पिनर लक्ष्मी साउदको उत्कृष्ट बलिङमा सुदूरपश्चिम प्रदेशले प्रधानमन्त्री कप महिला टि२० राष्ट्रिय प्रतियोगितामा मधेश प्रदेशमाथि पाँच विकेटको जित हात पारेको छ । चौथो जितसँगै सुदूरले शीर्ष दुई सम्भावना पनि बलियो बनाएको छ ।

जितको लागि ८३ रनको मध्यम विजयी लक्ष्य पछ्याएको सुदूरले १९.५ ओभरमा ५ विकेट गुमाउँदै पूरा गर्यो । सुदूरको जितमा कविता जोशीले ३८ बलमा ३ चौका र १ छक्कासहित सर्वाधिक २६ रन बनाइन् ।

त्यस्तै सम्झना खड्काले १९ बलमा ३ चौकासहित २१, रेवती धामीले ५, विन्दु रावल र रितु कनौजिया समान ४ रनमा आउट भए । मधेशकी साक्षी यादव र कविता गौतमले समान दुई विकेट लिइन् ।

त्यसअघि माथिल्लो मुलपानी क्रिकेट मैदानमा टस जितेर पहिला ब्याटिङ रोजेको मधेशले निर्धारित २० ओभरमा ७ विकेट गुमाउँदै ८२ रन बनाएको थियो । मधेशकी ओपनर पुजा महतोले ३१ बलमा ४ चौकासहित सर्वाधिक २७ रन बनाइन् । साना प्रविनले १९ र रोजी कडारीले १० रन बनाइन् ।

सुदूरको लागि लक्ष्मी साउदले ४ ओभरमा २१ रन खर्चेर ४ विकेट लिइन् । जानकी थापा र कविता जोशीले समान एक विकेट लिइन् । नेपाल एपिएफ क्लब ५ खेलमा १० अंकका साथ शीर्षस्थानमा छ । कोशी र सुदूरको समान ५ खेलमा ८–८ अंक छ । नेटरनरेटका कारण कोशी दोस्रो स्थानमा छ । शीर्ष चार टोली प्लेअफमा पुग्नेछन् ।