एजेन्सी – इंडियन प्रिमियर लिग (आईपिएल) अन्तर्गत मंगलबार भएको खेलमा सनराईजर्स हैदराबादले रोमाञ्चक जित दर्ता गरेको छ । हैदराबादले पञ्जाव किंग्स विरुद्ध २ रनको झिनो जीत दर्ता गरेको हो ।

हैदराबादले दिएको १८३ रनको लक्ष्य पछ्याएको पञ्जाबले २० ओभरमा ६ विकेट गुमाएर १८० रन मात्र बनाउन सक्यो ।

अन्तिम ओभरमा पञ्जावलाई जितका लागि २९ रन चाहिएको थियो । आशुतोष शर्माले पहिलो बलमा जयदेव उनादकटको बलमा छक्का प्रहार गरे । त्यसपछि उनादकटले लगातार दुई वाइड गरे तेस्रो बलमा पनि आशुतोषले छक्का प्रहार गरे । चौथो बलमा दुई रन आयो । २ बलमा ११ रन चहिएकोमा पाँचौं बलमा १ रन मात्र आएको थियो । अन्तिम बलमा शशाङ्क शर्माले छक्का प्रहार गरेपनि खेल हातबाट गइसकेको थियो ।

पञ्जाबका लागि शशाङ्कले २५ बलमा प्रहार गरेको ४६ रन नै सर्वाधिक रहेको थियो । यस्तै आशुतोषले १५ बलमा ३३ रनको विष्फोटक इनिङ खेलेपनि हार भने टार्न सकेनन् ।

स्याम करन र सिकन्दर राजाले क्रमसः २९ र २८ रन जोडेका थिए ।

हैदराबादका लागि भुवनेश्वर कुमारले २ तथा प्याट कमिन्स, नटराजन, नितिश रेड्डी र जयदेव उनादकटले १-१ विकेट लिए ।

त्यसअघि चण्डीगढमा टस हारेर पहिले ब्याटिङको निम्तो पाएको हैदराबादले निर्धारित २० ओभरमा ९ विकेट गुमाउँदै १८२ रन बनाएको थियो । हैदराबादका लागि युवा ब्याटर नितिश रेड्डीले ३७ बलमा ४ चौका र ५ छक्का सहित ६४ रन बनाएका थिए । यस्तै अब्दुल समादले २५ तथा ट्राभिस हेडले २१ रन जोड्नु बाहेक अन्य ब्याटरले उल्लेखनिय प्रदर्शन गरेका थिएनन् ।

पञ्जावका लागि अर्श्दिप सिंह एक्लैले ४ विकेट लिए भने स्याम करन र हर्षल पटेलले समान २-२ विकेट लिए । यस्तै कागिसो रबाडाले १ विकेट लिए ।

जित पछि ५ खेलमा ३ जित सहित हैदराबाद पाँचौं स्थानमा छ भने ५ खेलमा २ खेल जितेको पञ्जाब छैठौं स्थानमा छ ।

आईपिएलमा बुधवार हुने खेलमा राजस्थान रोयल्स र गुजरात टाईटन्स भिड्ने छन् ।