काठमाडौं (हाम्रो खेलकुद) – ललितपुर महानगरपालिकाको सहयोग र नेपाल क्रिकेट संघको आयोजनामा कीर्तिपुर स्थित टियु क्रिकेट मैदानमा आजदेखि ललितपुर मेयर्स कप २०८१ सुरु हुँदैछ ।

प्रतियोगितामा प्रधानमन्त्री कप महिला राष्ट्रिय क्रिकेट प्रतियोगिता २०८० को सेमीफाइनल पुग्न सफल नेपाल एपिएफ क्लब, कोशी प्रदेश, सुदूरपश्चिम प्रदेश र बागमती प्रदेशसँगै ललितपुर मेयर्स ११ गरी कुल ५ टोलीको सहभागिता रहनेछ । मेयर्स-११ मा अन्य प्रदेशका शीर्ष खेलाडी सम्मिलित छन् ।

प्रतियोगिता सिंगल राउन्ड रोबिनमा हुनेछ भने शीर्ष २ टोलीले उपाधिको लागि फाइनलमा प्रतिस्पर्धा गर्नेछन् । आज हुने खेलमा ललितपुर मेयर्स ११ र बागमती प्रदेश खेल्दैछन् ।

यसपटक कोशी प्रदेशकी कप्तान तथा राष्ट्रिय टोलीको पूर्व कप्तान रुविना क्षेत्रीले प्रतियोगिता नखेल्ने भएकी छिन् । मलेसियामा गत साता सम्पन्न प्रतियोगिता दौरान हातमा चोट लागेपछि उनले विश्राम लिने निर्णय गरेकी हुन् ।

नेपालले यसै जुलाईमा महिला एसिया कप खेल्दैछ । उक्त प्रतियोगिताका लागि पनि मेयर्स कपबाट खेलाडीले प्रभाव पार्न सक्नेछन् । क्यानले हालसम्म महिला राष्ट्रिय टोलीको मुख्य प्रशिक्षक दिर्घकालिन नियुक्ति भने दिएको छैन । पछिल्लो प्रतियोगितामा मनोज कटवाल प्रशिक्षक थिए ।