काठमाडौं (हाम्रो खेलकुद) – फ्रेन्चाइज टि -ट्वान्टी क्रिकेट नेपाल प्रिमियर लिग (एनपिएल) आउँदो नोभेम्बर /डिसेम्बर (कार्तिक/ मंसिर) हुने भएको छ ।

नेपाल क्रिकेट संघ (क्यान) को शुक्रबार सकिएको केन्द्रीय समितिको दुई दिने बैठकले यसै वर्ष सो एनपिएल आयोजना गर्ने निर्णय गरेको हो ।

पछिल्लो पटक नेपाल टि ट्वान्टी प्रतियोगितामा विभिन्न विवादमा मुछिएको थियो । क्यानले भारतीय कम्पनी सेभेनथ्री स्पोर्ट्स सँग ८ वर्षका लागि प्रतियोगिता गर्ने सम्झौता गरेको थियो ।

तर लगातार विवादमा परेका कारण क्यानले सो सम्झौता रद्द गर्दै आफै सो लिग आयोजना गर्ने निर्णय लिएको थियो । सोही लिग यसै वर्ष हुने भएको हो ।

क्यानले प्रतियोगितामा सहभागी टोलीहरूको लागि प्रक्रिया भने पछि सुरु गर्नेछ ।

यस्तै क्यानले सोही नेपाल टि-२० का बेला म्याच फिक्सिङमा मुछिएका अल राउन्डर आदिल आलमको निलम्बन फुकुवाको प्रकिया सम्बन्धमा संघको अनुसन्धान समितिलाई १ हप्ता भित्र निर्णय गर्न जिम्मेवारी समेत दिएको छ ।

स्पट फिक्सिङ गरेको आरोप लागेपछि आदिल नेपाली टोली र घरेलु क्रिकेटबाट प्रतिबन्धमा थिए । आरोपपछि पक्राउ परेका उनी र पूर्व अन्तर्राष्ट्रिय क्रिकेटर महबुब आमल र नितेश गुप्तालाई ३ लाख धरौटी रिहा भएका थिए ।