एजेन्सी – दुई टेस्ट सिरिजका लागि वेस्ट इन्डिज भ्रमणमा रहेको दक्षिण अफ्रिकाले दोस्रो इनिङमा अग्रता फराकिलो बनाउँदै लगेको छ । दोस्रो दिन शुक्रवारको खेल सकिदा भ्रमणकारी टोलीले २ सय ३९ रनको अग्रता लिइसकेको छ ।

पहिलो ईनिङमा खास ब्याटिङ गर्न नसकेको पाहुना टोलीले १६ रनको अग्रता लिएको थियो । त्यसमा ५ विकेटको नोक्सानीमा २ सय २३ रन थपेर दोस्रो इनिङको अग्रता २ सय ३९ मा पुर्याएको हो । पाहुना टोलीका लागि काइल वेरीएन्ने ५० तथा वायन मुल्दार ३४ रनमा अविजित रहेका छन् ।

ओपनर एडेन मारकमले १ सय ८ बलमा ५१, अर्का ओपनर टोनि डि जोर्जीले ३९, ट्रिस्टन स्टम्सले १६ रन जोडे । वेस्ट इन्डिजका लागि जयडेन सेल्सले ३ तथा गुणकेश मोटी २ विकेट लिए ।

वेस्ट इन्डिजको गयनामा बिहिवार सुरु दोस्रो टेस्टमा टस जितेर ब्याटिङ रोजेको पाहुना टोली पहिलो इनिङमा १ सय ६० रनमा अल आउट भएको थियो ।

दक्षिण अफ्रिकाका लागि डेन पाइटले ६० बलमा अविजित रहँदै सर्वाधिक ३८ रन जोडे । डेविड बेडिन्हामले ५४ बलमा २८, ट्रिस्टन स्टम्सले २६, नान्द्रे बर्गरले २३, काइल वेरीएन्नेले ३३ बलमा २१ तथा ओपनर एडेन मारकमले ३० बलमा १४ रन बनाए ।

वेस्ट इन्डिजका लागि शेमार जोसेफले १४ ओभरमा ३३ रन खर्चिएर ५ विकेट लिए । जयडेन सेल्सले ३, गुणकेश मोटी र जेसन होल्डरले समान १ विकेट लिए ।

पहिलो दिनको खेल सकिदा घरेलु टोली वेस्ट इन्डिजले ७ विकेट गुमाएर ९७ रन जोडेको थियो। घरेलु टोलीका जेसन होल्डर ३३ रनमा अविजित रहँदा केसी कार्टीले ३७ बलमा २६, कप्तान गुणकेश मोटीले ३५ बलमा ११ रन थपे ।

दक्षिण अफ्रिकाका लागि वायन मुल्दारले ४, नान्द्रे बर्गरले २ तथा केशव महाराजले १ विकेट लिए । दुईबीचको पहिलो टेस्ट बराबरीमा सकिएको थियो । दुई टोलीबीच २४ अगस्टबाट ३ खेलको टि ट्वान्टी सिरिज पनि छ ।