एजेन्सी – अन्तर्राष्ट्रिय क्रिकेट परिषद (आइसिसी) ले आफ्ना सबै एसोसिएट सदस्य राष्ट्रबीचको हुने टि२० खेललाई सन् २०१८ मा टि२० अन्तर्राष्ट्रिय मान्यता दिने निर्णय गरेको थियो ।

त्यसपछि टि ट्वान्टी आईमा प्रतिस्पर्धी टोलीको संख्या १८ बाट बढेर १ सय ४ पुगेको थियो । यसबीचमा एसोसिएट टोलीले धेरै कीर्तिमानहरु तोडेका छन् । एसोसिएट राष्ट्र तथा क्रिकेटरहरुले पुरुष टि ट्वान्टी आईमा बनाएका केही कीर्तिमान यस प्रकारका छन् ।

एक ओभरमा सर्वाधिक रन : ३९ रन

यो कीर्तिमान सामोआका ब्याट्सम्यान डारियस भिसेरको नाममा छ । उनले यो कीर्तिमान भानुआतुका मध्यम गतिका बलर नलिन निपिकोविरुद्ध एकै ओभरमा ३९ बनाएका थिए । यसअघि युवराज सिंह, किरन पोलार्ड, दीपेन्द्रसिंह ऐरी र निकोलस पूरन को नाममा यो कीर्तिमान रहेको थियो ।

एक इनिङमा सर्वाधिक १८ छक्का

यो कीर्तिमान इस्टोनियाका ब्याट्सम्यान साहिल चौहानको नाममा छ । चौहानले साइप्रसविरुद्ध ४१ बलमा अविजित १ सय ४४ रन बनाउने क्रममा १८ छक्का प्रहार गरेका थिए । यसअघि यो कीर्तिमान अफगानिस्तानका हरजतुल्लाह जजाईको नाममा थियो । जजाईले आयरल्यान्डविरुद्धको खेलमा १६ छक्का प्रहार गरेका थिए ।

उत्कृष्ट बलिङ – ८ रन ७ विकेट

यो कीर्तिमान मलेसियाका मध्यम गतिका बलर स्याज्रुल इद्रुसको नाममा छ । उनले जुलाई २०२३ मा चीनविरुद्ध टि ट्वान्टी आईमा ८ रन खर्चेर ७ विकेट लिने कीर्तिमान बनाएका थिए । इद्रुसभन्दा पहिले यो कीर्तिमान नाइजेरियाका पिटर अहोको नाममा थियो । उनले सन् २०२१ मा सियरा लियोनविरुद्ध ५ रन दिएर ६ विकेट लिएका थिए ।

सबैभन्दा छिटो अर्धशतक : ९ बलमा

यो कीर्तिमान नेपालका दीपेन्द्रसिंह ऐरीको नाममा रहेको छ । दीपेन्द्रले मंगोलियाविरुद्धको ९ बलमा अर्धशतक पूरा गरेका थिए । उनले सन् २००७ को टि ट्वान्टी विश्वकपमा इंग्ल्यान्डविरुद्ध १२ बलमा अर्धशतक प्रहार गरेका युवराज सिंहको कीर्तिमान तोडेका थिए ।

उच्चतम टिम स्कोर : ३ सय १४ रन

यो कीर्तिमान नेपालको नाममा रहेको छ । नेपालले मंगोलियाविरुद्ध यो कीर्तिमान बनाएको थियो । यस खेलमा नेपालले पहिलो पटक टि ट्वान्टी आईमा ३ सय रन पूरा गरेको थियो ।

कम बलमा शतक : २७ बल

यो कीर्तिमान इस्टोनियाका साहिल चौहानको नाममा छ । चौहानले साइप्रसविरुद्धको खेलमा २७ बलमा शतक पूरा गरेका थिए । यसअघि यो कीर्तिमान नामिबियाका जान निकोल लोफ्टी इटनले नेपालविरुद्ध ३३ बलमा बनाएका थिए ।

डेब्यु मा उच्चतम स्कोर : १ सय ८

यो कीर्तिमान क्यानडाका म्याथ्यु स्पूर्सको नाममा छ । उनले फिलिपिन्ससँगको आफ्नो डेब्यु खेलमा नट आउट रहँदै १ सय ८ रन बनाएका थिए । यसअघि यो कीर्तिमान रिकी पोन्टिङको नाममा थियो । उनले डेब्यु टि ट्वान्टी आई खेलमा नट आउट ९८ रन बनाएका थिए।

सबैभन्दा कम उमेरमा डेब्यु : १४ वर्ष १६ दिन

यो कीर्तिमान रोमानियाका मारियन घेरासिमको नाममा छ । उनले १४ वर्ष १६ दिनमा बुल्गेरियाविरुद्ध डेब्यूको गरेका थिए । यसअघि यो कीर्तिमान ग्रीसका खेलाडीको नाममा थियो ।