एजेन्सी – पाकिस्तान र इङ्ग्ल्यान्डबीचको दोस्रो टेस्टको तेस्रो दिन १६ विकेट झरेको छ । इङ्ग्ल्यान्ड ३ टेस्ट सिरिजका लागि पाकिस्तान भ्रमणमा रहेको छ ।

तेस्रो दिनको सुरुवातमा पाहुना टोलीले पहिलो इनिङको बाँकी ४ विकेट गुमायो । त्यसपछि घरेलु टोलीले दोस्रो इनिङको १० तथा पाहुना टोलीले दोस्रो इनिङको २ विकेट गुमायो । बेन डुकेटको शतकका बाबजुद पाहुना टोलीले पहिलो इनिङमा २ सय ९१ रन मात्र जोड्न सक्यो ।

टोलीका लागि डुकेटले १ सय २९ बलमा १ सय १४, जो रुटले ३४, ओली पोपले २९, ज्याक क्रलीले २७ तथा ज्याक लिचले नट आउट २५ रन बनाए । पाकिस्तानका लागि साजिद खानले २६.२ ओभरमा १ सय ११ रन खर्चिएर ७ विकेट लिए । नोमान अलिले ३ विकेट लिए । पहिलो इनिङमा इङ्ग्ल्यान्ड ७५ रनले पछि परेको थियो ।

इङ्ग्ल्यान्ड पहिलो इनिङमा २ सय ९१ रनमा समेटिए पछि दोस्रो इनिङको सुरुवात गरेको घरेलु टोलीले २ सय २१ रन मात्र जोड्न सक्यो । टोलीका लागि सलमान आगाले सर्वाधिक ६३, साउद सकिलले ३१, कमरान गुलामले २६, सइम अबयु र साजिद खानले समान २२ तथा कप्तान शान मक्सुदले ११ रन जोडेका थिए ।

भ्रमणकारी टोलीका लागि शोयब बसिरले ४, ज्याक लिचले ३ तथा म्याथ्यु पोटले १ विकेट लिए । घरेलु टोलीले दोस्रो इनिङमा २ सय ९६ रनको अग्रता लिएको थियो ।

२ सय ९७ रनको लक्ष्यका साथ आजै दोस्रो इनिङको सुरुवात गरेको भ्रमणकारी टोलीले तेस्रो दिन‌ बिहीवारको खेल सकिँदा २ विकेट गुमाएर ३६ रन जोडेको छ । टोलीका ओली पोप र जो रुट क्रिजमा छन् ।

त्यसअघि पाकिस्तानको मुल्तान क्रिकेट स्टेडियममा टस जितेर ब्याटिङ रोजेको घरेलु टोलीले कमरान गुलामले डेब्यु खेलमा नै शतक प्रहार गरेपछि ३ सय ६६ रन बनाएको थियो ।