काठमाडौं (हाम्रो खेलकुद) – नेपाली यु १९ राष्ट्रिय टोलीको मुख्य प्रशिक्षकमा नियुक्त भएका शक्ति गौचनलाईले धेरै खुसी हुने भन्दा पनि जिम्मेवारी थपिएको महसुस गरको बताएका छन् ।

नेपाल क्रिकेट संघ (क्यान) ले शनिवार एसिया कपको लागि हेमन्त धामीको कप्तानीमा १८ सदस्यीय टोली घोषणा गर्दा मुख्य प्रशिक्षकको जिम्मेवारी गौचनलाई दिएको हो ।

‘जिम्मेवारी पाउँदा खुसी त लागि हाल्छ । यो खुसी हुने भन्दा पनि मलाई ठूलो जिम्मेवारी थपिएको महसुस गरेको छु ,’ गौचनले हाम्रो खेलकुदसँग भने ‘संघले जुन विश्वासका साथ मलाई जिम्मेवारी दिनु भएको छ । त्यसलाई सफल बनाउने मेरो प्रयास रहनेछ ।’

केही दिनअघि सकिएको यु १९ राष्ट्रिय क्रिकेटमा शक्ति मुख्य प्रशिक्षक रहेको लुम्बिनी प्रदेश दोस्रो भएको थियो । सन् २०१८ मा सक्रिय खेल जीवनबाट सन्यास लिएपछि गौचन रुपन्देहीमा आफ्नै क्रिकेट एकेडेमी संचालन गर्दै आएका छन् ।

नेपाली यु १९ टोलीका पूर्व कप्तान समेत रहेका गौचनले दुई दशकपछि सोही टोलीको मुख्य प्रशिक्षकको जिम्मेवारी पाएका हुन् । यसअघि यु १९ टिमका मुख्य प्रशिक्षकमा जगत टमाटा रहेका थिए । गौचनले पहिलो पटक कुनै पनि राष्ट्रिय टोलीको मुख्य प्रशिक्षकको जिम्मेवारी पाएका हुन् ।

गौचन २०२१ को एभरेष्ट प्रिमियर लिग(इपिएल) मा पोखरा राइनोजकाे बलिङ प्रशिक्षकमा रहेका थिए । अर्को महिना हुने नेपाल प्रिमियर लिग (एनपिएल) मा उनी लुम्बिनी लायन्सले कन्सल्ट्यान्ट कोचको रुपमा रहेका छन् ।

एसिया कप मंसिर १४ देखि २३ गतेसम्म युएईमा आयोजना हुँदैछ । एसिसीको आयोजनामा हुने प्रतियोगितामा एसियाका आठ देशले सहभागीता जनाउँदै छन् ।

प्रतियोगितामा एसियाका ५ टेस्ट राष्ट्र स्वत छनोट भएका थिए । नेपाल, युएई र जापान गत वर्ष मलेसियामा भएको एसिसी प्रिमियर कपको शीर्ष ३ मा रहेर छनोट भएका थिए । गत अक्टोबरमा भएको यस प्रतियोगितामा युएईलाई हराउँदै नेपाल च्याम्पियन भएको थियो ।

प्रतियोगितामा सहभागी ८ टोलीलाई २ समूहमा विभाजन गरिएको छ । नेपाल समूह ‘बी’ मा श्रीलंका, बंगलादेश र अफगानिस्तानसँग रहेको छ।

समूह ‘ए’ मा भारत, पाकिस्तान, जापान र युएई छन् । समूहका शीर्ष २ टोलीले सेमिफाइनलमा पुग्नेछन् । फाइनल मंसिर २३ गते हुनेछ ।

नेपाली यु १९ टोली

हेमन्त धामी (कप्तान), अर्जुन कुमाल(उपकप्तान), आकाश त्रिपाठी, उत्तम थापा, मयन यादव, नरेन साउद, युनिस विक्रम सिंह ठकुरी, नरेन भट्ट, सन्तोष यादव, युवराज खत्री, रोशन विक, विपिन महतो, राजेश यादव, दयानन्द मण्डल, अपराजित पौडेल, अभिषेक तिवारी, दिलसाद अलि र रन्जित कुमार।