काठमाडौं (हाम्रो खेलकुद) – एसीसी मेन्स यू१९ एसिया कपको तयारीका लागि कर्नाटक यू१९ विरुद्ध जारी मैत्रीपूर्ण सिरिजको तेस्रो खेलमा नेपालले जित हासिल गरेको छ ।

मुलपानी क्रिकेट मैदानमा नेपालले १ सय २१ रनको जित दर्ता गर्दै सिरिजमा २-१ को अग्रता लिएको छ । जितका लागि २ सय ८३ रनको लक्ष्य पछ्याएको कर्नाटकले ४०.२ ओभरमा अलआउट हुँदै १ सय ६१ रन जोड्यो । कर्नाटकका लागि ओपनर गगन रावले सर्वाधिक ४६ रन जोडे ।

पहिलो विकेटका लागि प्रतिक र गगनले ४३ रन जोडेका थिए । दशौं ओभरमा युवराज खत्रीले डाइरेक्ट थ्रोमा प्रतिकलाई रनआउट गरेपछि नेपालले पहिलो सफलता पाएको थियो । त्यसपछि भने नेपाली स्पिनरले खेललाई नियन्त्रणमा राखे ।

मध्यक्रममा शिवले २३ रन जोड्नुबाहेक अन्य ब्याटरले खासै योगदान दिन सकेनन् । १००-२ को स्थितिबाट टोली ४१ औं ओभरमा अलआउट हुन पुग्यो । बायाँ हाते स्पिनर नरेन साउदले ४ विकेट लिँदा लेग स्पिनर युवराज खत्रीले ३ विकेट लिए । अपराजित पौडेलले १ विकेट हात पारे ।

त्यसअघि टस हारेपछि ब्याटिङको निम्तो पाएको नेपालले ५० ओभरमा ६ विकेट गुमाएर २ सय ८२ रनको बलियो योगफल खडा गरेको थियो । नेपालका लागि रोशन विकले ५७ बलमा नटआउट ८१ रनको योगदान दिँदै बलियो योगफलसम्म पुर्याएका थिए । उनले ६ चौका र ३ छक्का प्रहार गरे ।

विहानी कन्डिसनमा ओपनरद्वय आकाश त्रिपाठी र मयनले संयमित ब्याटिङ गर्दै नेपाललाई राम्रो सुरुवात दिलाए । त्यसपछि मध्यक्रममा रोशन र उत्तमले आक्रामक ब्याटिङ गर्दै नेपाललाई बलियो योगफलसम्म पुर्याए ।

आकाश र मयनले १३ ओभरमा ६३ रनको साझेदारी गरेका थिए । स्पिनरले फ्याँकेको पहिलो ओभरमा पोइन्टमा क्याच आउट हुनुअघि आकाशले २६ रन जोडे । उनले ४० बलमा ४ चौका प्रहार गरे । त्यसपछि अर्जुन र मयनले ५२ रनको साझेदारी गरे । अर्जुनले २५ औं ओभरमा लोहिथको बलमा बोल्ड हुनुअघि २४ बलमा ३ चौकासहित २७ रन जोडे ।

मयन पनि २८ औं ओभरमा कट बिहाइन्ड भए । उनले ९८ बलको सामना गर्दै ६ चौका र २ छक्कासहित ५८ रन जोडे । दिल्शाद अलीको ब्याटबाट पुन: एकपटक रन निस्केन । उनी ३ रन जोड्दै स्पिनर लोहिथकै बलमा कट बिहाइन्ड भए । नरेन भट्टले ३७ औं ओभरमा आउट हुनुअघि १४ रन बनाए । उनी आउट हुँदा नेपाल १७४-५ को स्थितिमा थियो ।

त्यसपछि बागमती प्रदेशबाट खेल्दै आएका रोशन र उत्तमले आक्रामक साझेदारी गरे । ४९ औं ओभरमा आउट हुनुअघि उत्तमले ४४ बलमा ३ चौका र २ छक्कासहित ५२ रन बनाए । यी दुईले ७१ बलमा ९९ रनको साझेदारी गरेका थिए ।

कर्नाटकका लागि स्पिनरद्वय लोहिथ र वासुले २-२ विकेट लिँदा इसा पुथिगे र प्रणव अश्वथले १-१ विकेट हात पारे ।

सिरिज अन्तर्गत चौथो खेल मंगलबार र अन्तिम खेल विहीबार हुनेछ ।