काठमाडौं(हाम्रो खेलकुद) – राष्ट्रिय महिला क्रिकेट टोलीकी कप्तान इन्दु बर्मा सिद्धार्थ बैंक नेपाल प्रिमियर लिग(एनपिएल) मा काठमाडौं गुर्खाजको क्रिकेट एम्बेसडर नियुक्त भएकी छिन् ।

काठमाडौंले एक कार्यक्रमका बीच इन्दुलाई टोलीको क्रिकेट एम्बेसडर नियुक्त गरेको हो । इन्दुले एनपिएल टोली काठमाडौंको अंग हुन पाएकोमा खुसी व्यक्त गर्दै धन्यवाद दिइन् ।

‘एनपिएल फेस्टिभल अफ क्रिकेटको रुपमा रहने छ । एनपिएलले गरेर समग्र नेपाली क्रिकेट नै उत्साहित छौं,” इन्दुले सो अवसरमा भनिन् “अहिलेको स्थितिमा नेपाली महिला/ पुरुष क्रिकेटको‌ क्रेज बढेको छ । हामीलाई भविष्यमा महिलाको पनि फ्रान्चाइज लिग हुने पनि आशा छ।’

कार्यक्रममा बोल्दै नेपाल क्रिकेट संघ(क्यान) का सचिव पारस खड्काले विश्व सामू नेपाली खेलाडी र प्रशिक्षकले आफ्नो क्षमता देखाउने अवसर आएको बताए । नेपाली क्रिकेटलाई विश्वसामू पुर्याउने क्यानको अभियानमा साथ दिने फ्रेन्चाइजीहरुलाई सचिव खड्काले धन्यवाद दिए ।

बसन्त शाही ठकुरी काठमाडौंको मुख्य प्रशिक्षकमा रहेका छन् । काठमाडौं गुर्खाजको ‘मार्की’ खेलाडीमा करण केसी छन् । त्यसबाहेक टोलीले अक्सनबाट शाहव आलम, भिम सार्की, रशिद खान, शंकर राना, कृष्ण कार्की, दीपेश कडेल, सुमित महर्जन, राजु रिजाल, विवेक केसी र प्रतिक श्रेष्ठलाई लिएको थियो ।

काठमाडौं स्पोर्टस डेभलपमेन्ट भेन्चरको स्वामित्वमा रहेको काठमाडौं गुर्खाजले विदेशी खेलाडीको रुपमा यसअघि नेदरल्यान्ड्सका ओपनर माइकल लेभिट, नामिबियाका कप्तान मर्वी जेर्राड इरसमस तथा इंग्लिस क्रिकेटरद्वय स्टेफन इस्किनाजी र ड्यान डौथवेटलाई अनुवन्ध गरिसकेको छ ।