काठमाडौं (हाम्रो खेलकुद) – सिद्धार्थ बैंक नेपाल प्रिमियर लिग (एनपिएल) अन्तर्गत नेपाल क्रिकेट संघ (क्यान) ले सोमबार खेल तालिका सार्वजनिक गरेको छ ।

क्यानले मंसिर १५ देखि पुष ६ गते (नोभेम्बर ३० देखि डिसेम्बर २१) सम्म संचालन गर्नेछ । एनपिएलको लिग चरणको खेल पुष १ गतेसम्म हुनेछ । यसका लागि लिग चरणको १७ दिनमा २ दिन विश्रामसहित १५ दिन खेल हुनेछन् । लिग चरणमा २८ खेल हुनेछन् जसमा पहिलो र अन्तिम दिन १-१ खेल हुनेछन् ।

मंसिर १५ गते विराटनगर किंग्स र जनकपुर बोल्ट्सले मध्यान्ह १२:१५ बजे खेलेर एनपिएलको सुरुवात गर्नेछन् । मंसिर १६ गते स्थानीय चुनाव भएकाले विश्राम राखिएको छ । त्यसपछि मंसिर २४ गते सोमबार विश्राम रहनेछ । त्यसबाहेक हरेक दिन २ खेल हुनेछ ।

लुम्बिनी लायन्सले लिगको १७ दिनमध्य १० दिनको अन्तरमा सबै ७ खेल खेल्नेछ । प्रतियोगिताको चौथो दिन सबै टोलीले खेलिसकेपछि लुम्बिनीले आफ्नो पहिलो खेल खेल्नेछ ।

लुम्बिनीको पहिलो प्रतिद्वन्द्वी विराटनगरले आफ्नो तेस्रो खेल खेलिरहेको हुनेछ । त्यसै दिन विहान कर्णाली र काठमाडौंले आफ्नो दोस्रो खेल खेल्नेछन् । त्यस्तै चितवनले अघिल्लो दिन दोस्रो खेल खेलिसकेको हुनेछ ।

अन्य टोलीले भने अधिकतम २ दिन निरन्तर खेल्नुपर्नेछ । २ दिन खेलेपछि टोलीले कम्तिमा १ दिन विश्राम भने पाउनेछन् । लगातार खेल संख्याको हकमा कर्णाली भने भाग्यमानी सावित भएको छ । कर्णालीले एकपटक मात्र लगातार खेल खेल्नुपर्नेछ । अन्य टोलीले २-२ पटक लगातार दिनमा खेल्दा काठमाडौंले भने ३ पटक लगातार दिनमा खेल्नेछ ।

त्यस्तै लिग चरण सकिनुभन्दा ३ दिन अघि नै लुम्बिनीले आफ्नो अन्तिम खेल खेल्नेछ । यसक्रममा लुम्बिनीले लगातार ३ दिन खेलेर एक दिन विश्रामपछि फेरी लगातार २ दिन खेल्नेछ । लुम्बिनीको सबै लिग खेल सकिँदा काठमाडौं, विराटनगर, चितवन, पोखरा र सुदूरपश्चिमको २-२ खेल तथा कर्णाली र जनकपुरको १-१ खेल बाँकी रहेको हुनेछ ।