काठमाडौं(हाम्रो खेलकुद) – नेपाली राष्ट्रिय क्रिकेट टोलीका अलराउण्डर दीपेन्द्रसिंह ऐरी सम्मिलित गल्फ जायन्ट्स अन्तर्राष्ट्रिय लिग (आईएल) टि ट्वान्टीमा विजयी भएको छ ।

शनिवार भएको खेलमा गल्फले एमआई इमिरेट्सलाई २ विकेटले पराजित गरेको हो । गल्फले छैठौं खेल खेलिसक्दा पनि दीपेन्द्रलाई डेब्युको अवसर दिएको छैन ।

१ सय ५३ रनको लक्ष्य गल्फले निर्धारित २० ओभरको अन्तिम बलमा ८ विकेट गुमाएर पूरा गर्यो । गल्फको जितमा जेहार्ड एरास्मसले सर्वाधिक ३७, टोम अल्सोपले ३२, टोम करनले १६ तथा मार्क अडिरले १५ रन जोडे ।

इमिरेट्सका लागि फैजल हक फारुकीले ३, मोहम्मद रोहिद र अल्जारी जोसेफले समान २ तथा डान मुस्लेले १ विकेट लिए । त्यसअघि शेख जायद क्रिकेट स्टेडियममा टस हारेर ब्याटिङको निम्तो पाएको इमिरेट्सले निर्धारित २० ओभरमा ६ विकेट गुमाएर १ सय ५१ रन जोडेको थियो ।

इमिरेट्सका लागि टम बेन्टनले सर्वाधिक ५६ रन जोडे । किरन पोलार्डले २४ बलमा ३४ र अकिल हुसेनले ११ बलमा नट आउट २० रन जोडे । गल्फका लागि डानियल वारेलले २ तथा ब्लेसिङ मुजवानी, टोम करन र मार्क अडिरले समान १ विकेट लिए ।

जितसँगै गल्फ ६ खेलमा ४ अंकका साथ पाँचौ स्थानमा छ । पराजित इमिरेट्स ७ खेलमा ६ अंकका साथ दोस्रो स्थानमा छ ।