काठमाडौं(हाम्रो खेलकुद) – पाहुना टोली इङ्ग्ल्याण्डविरुद्ध भारतले चौथो टि ट्वान्टी आईमा बलियो योगफल तयार गरेको छ ।

भारतको पुनेमा जारी खेलमा भारतले इङग्ल्याण्डलाई १ सय ८२ रनको बलियो लक्ष्य दिएको छ । पुनेस्थित महाराष्ट्र क्रिकेट एसोसियसनको मैदानमा टस हारेर ब्याटिङको निम्तो पाएको भारतले निर्धारित २० ओभरमा ९ विकेट गुमाएर १ सय ८१ रनको बलियो योगफल तयार गर्यो ।

भारतका लागि शिभम दुवे र हार्दिक पाण्ड्याले सर्वाधिक रुपमा समान ५३ रन जोडे । दुवेले ३४ बलमा ७ चौका र २ छक्का प्रहार गरे । पाण्ड्याले ३० बलमा ४ चौका र ४ छक्का प्रहार गरे ।

छैठौं विकेटका लागि दुवे र पाण्ड्याले ८७ रनको साझेदारी गर्दै टोलीलाई बलियो योगफल सम्म पुर्याए ।दोस्रो ओभरमा १२ रनमा ३ विकेट गुमाएको भारतका लागि रिंकु सिंह र अभिषेक शर्माले ४५ रनको साझेदारी गरेका थिए । सिंह ३० र शर्मा २९ रनमा आउट भए ।

भारतका कप्तान सुर्यकुमार यादव र तिलक बर्मा रनको खाता नखोल्दै आउट भए । ओपनर सञ्जु स्यामसन १ रनमा आउट हुँदा अक्षर पटेल ५ रनमा आउट भए ।

इङ्ग्ल्याण्डका लागि सकिब मोहम्मदले ३, जेमी ओभरटर्नले २ तथा आदिल राशिद र बायडेन कार्सले समान १ विकेट लिए ।

५ खेलको टि ट्वान्टी आई सिरिजमा भारत २-१ ले अघि छ । पहिलो र दोस्रो टि ट्वान्टी आई भारतले जित्दा तेस्रो खेल भने इङ्ग्ल्याण्डले जितेको थियो ।