काठमाडौं – सुदूरपश्चिम प्रदेशका फिनिसर ब्याटर किरण ठगुन्ना पहिलो पटक नेपालको राष्ट्रिय टोलीमा परेका छन् ।

हङकङमा आजदेखी सुरु हुने चारदेश सम्मिलित टी-२० आई सिरिजमा आक्रामक ब्याटर लोकेश बमको भिसा समस्याको कारण नेपालले किरणलाई बोलाएको हो । किरण हङकङतर्फ मंगलबार राती नै प्रस्थान गरी सकेपनि नेपाल क्रिकेट संघ(क्यान) ले भने औपचारिक रुपमा घोषणा गर्न बाँकी छ ।

सुदूरपश्चिमबाट घरेलु क्रिकेट खेल्ने किरणले पछिल्लो समय राष्ट्रिय प्रतियोगितामा राम्रो प्रदर्शन गर्दै आएका छन् । हालैसम्पन्न प्रधानमन्त्री कप एकदिवसीय राष्ट्रिय प्रतियोगितामा उनले ९ इनिङमा २ शतकसहित ३२ चौका र १४ छक्काको मद्दतमा ३ सय ३७ रन बनाएका थिए ।

किरणले गण्डकी प्रदेशविरुद्ध चौथो नम्बरमा ब्याटिङ गर्दै १०१ बलमा ९ चौका र ६ छक्कासहित १ सय २१ अविजित तथा कोशीविरुद्ध ९१ बलमा १२ चौका र ४ छक्कासहित १ सय १५ रनको अर्को विजयी शतकीय इनिङ खेलेका थिए । गतवर्ष उनले क्यानडाविरुद्ध नेपाल ए बाट पनि खेलेका थिए ।

घरेलु क्रिकेटमा मध्यक्रम र फिनिसरमा राम्रो प्रभाव छोडेपछि उनलाई नेपालले टोलीमा समेटेको हो । नेपालले आफ्नो पहिलो खेलमा आज विहान ६ : ४५ मा कतारसँग खेल्दै सुरुवात गर्नेछ । बिहीबार कुवेत र शनिबार घरेलु टोली हङकङसँग खेल्नेछ ।

नेपालको टोली :

रोहित पौडेल (कप्तान), आसिफ शेख, कुशल भुर्तेल, किरण ठगुन्ना (पहिलो पटक टोलीमा), बसिर अहमद, दीपेन्द्रसिंह ऐरी, कुशल मल्ल, ललितराजवंशी, सोमपाल कामी, करण केसी, साहब आलम, नन्दन यादव ( नेपालको जर्सीमा डेब्यू गर्न बाँकी) रिजन ढकाल र गुल्शन झा ।

कार्यवाहक मुख्य प्रशिक्षक – ज्ञानेन्द्र मल्ल

फिजियो- पुरण तिरुवा

टेक्निकल एनालिष्ट – रमण शिवाकोटी

किरणको पूरा क्रिकेट जीवनी जान्न यो पढ्नुहोस् : घरमै बलिङ मेसिन राखेर आफूलाई निखारेका किरण