विराटनगर (हाम्रो खेलकुद)- नेपाल पुलिस क्लब विराटनगरमा जारी मनमोहन (एमएम) कप एकदिवसीय राष्ट्रिय क्रिकेट प्रतियोगिताको फाइनल प्रवेश गरेको छ।  पुलिसले उपाधिका लागि त्रिभुवन आर्मी क्लबसँग खेल्नेछ।

पुलिसले भारतको आसाम क्रिकेट क्लबलाई ६ विकेटले पराजित गर्दै फाइनलमा स्थान बनाएको हो।

विराटनगरको बैजनाथपुर स्थित गिरिजाप्रसाद कोइराला क्रिकेट मैदानमा पुलिसले १ सय ५५ रनको लक्ष्य २८ ओभरमा पछ्याउनु पर्ने थियो। जहाँ पुलिसले २६ .१ ओभरमा ४ विकेटको नोक्सानीमा पूरा गर्यो।

पुलिसले सुरुवात राम्रो गर्न सकेन । ४३ रनमा ४ विकेट गुमाइसकेको थियो। यसपछि अमित श्रेष्ठ र कप्तान शंकर रानाले पाँचौ विकेटको लागि अविजित १ सय १७ रनको साझेदारी गर्दै जिततर्फ डोर्याए।

अमित र शंकरले अविजित रहँदै अर्धशतकीय पारी खेले। अमितले ७२ बलमा ५ चौका र ३ छक्काको मद्दतले ७१ रन बनाए। यस्तै छैठौं नम्बरमा ब्याटर शंकरले ६७ बलमा ४ चौका र ४ छक्का प्रहार गर्दै ६३ रन जोडे। 

बलिङमा गोकुल शर्माले सर्वाधिक ३ विकेट लिए। चिरन्तन खात्तिनियरले १ विकेट झारे। 

त्यस अघि टस जितेर ब्याटिङ गरेको आसामले ४२.२ ओभरमा १ सय ५४ रनमा अल आउट भयो।
आसामको लागि ओपनर राज विश्वले सर्वाधिक ३३ रन बनाए। यस्तै अरुण सोनारले ३१, केभिन संजिवले २३ तथा हियम कश्यपले १९ रन जोडे। 

बलिङमा अरुण ऐरी र पेसर श्रवन यादवले समान ३ विकेट लिए। ऐरीले ९ ओभरमा १ मेडन गर्दै १७ रन खर्चिए भने यादवले ३ ओभरमा ७ रन दिए। पुलिस पहिलो खेलमा कोशीदँग पराजित भए पनि यो खेल जितेर फाइनलमा पुगेको हो।

एमएम कप फाउन्डेसनद्वारा आयोजित प्रतियोगिताको विजेताले ४ लाख र दोस्रो हुने टिमले २ लाख रुपैयाँ प्रदान गरिनेछ।

समूह ‘ए’ को विजेताको रुपमा आर्मी यस अघिनै फाइनल पुगिसकेको छ। फाइनल खेल शनिवार हुनेछ।