काठमाडौं (हाम्रो खेलकुद) – लुम्बिनी प्रदेश क्रिकेट संघका अध्यक्ष संजय गुरुङले नेपाल क्रिकेट संघ (क्यान) का अध्यक्ष चतुरबहादुर चन्दले आफूलाई पदबाट हटाउन षड्यन्त्र गरेको आरोप लगाएका छन् ।

गुरुङले आज काठमाडौंमा पत्रकार सम्मेलन आयोजना गर्दै चन्दले आफू विरुद्ध उत्रन प्रदेश क्रिकेट संघका सदस्यहरुलाई हस्ताक्षर संकलन गरेर षड्यन्त्र गरेको आरोप लगाएका छन् । उनले प्रदेशको आन्तरिक छलफलबिनै सिधै क्यानको केन्द्रिय कार्यालयमा अविश्वासको प्रस्ताव दर्ता गराउने कदमले आफू अपमानित भएको बताए । उनले क्यानबाट आफू निलम्बित भएको पत्र प्राप्त गर्दा उक्त पत्रमा अध्यक्ष चन्दकै हस्ताक्षर रहेको बताए ।

‘क्यान अध्यक्षले आफैं हस्ताक्षर गरेर मलाई पत्र पठाउनुभएको छ । क्यानबाट आउने पत्र सचिव र सचिवालयमार्फत आउनुपर्ने हो । तर क्यानको अध्यक्षले हस्ताक्षर गरेको पत्र मैले पाएँ,’ गुरुङले भने, ‘प्रदेश गठन भएको २ वर्षसम्म नआएको विनियमावली मलाई कारवाही गरेको पत्र पठाएकै दिन प्रदेशमा आएको छ । यो सिधा सिधा प्रतिशोध साँधिएको छ ।’

यता अध्यक्ष चन्दले भने गुरुङको कार्यशैलीप्रति प्रदेशका सदस्य जिल्लाहरुबाट नै असन्तुष्टि आएपछि सो कदम चालिएको बताए । उनले बहुमत भन्दा बढी सदस्यहरुले आर्थिक रुपमा अध्यक्षको कार्यशैलीमा शंका व्यक्त गरेपछि क्यानले आवश्यक कदम चालेको बताए ।

‘वहाँले बिना कोषाध्यक्षको हस्ताक्षर प्रदेश संघ चलाइ रहनुभएको रहेछ । संघकै साथीहरुले भनेपछि हामीले कदम चालेका हौं । नेपाल क्रिकेट संघ विधि र विधानले चल्ने संस्था हो । हामीले हाललाई लुम्बिनी प्रदेशले पाउने आर्थिक सहयोग पनि रोकेर राखेका छौं,’ चन्दले भने ।