एजेन्सी – इण्डियन प्रिमियर लिग (आइपिएल) मा चेन्नई सुपर किंग्सले गुजरात टाइटन्सलाई २ सय ३१ रनको विशाल लक्ष्य दिएको छ ।

गुजरातको घरेलु मैदान नरेन्द्र मोदी क्रिकेट स्टेडियममा टस जितेर पहिले ब्याटिङ गरेको चेन्नईले निर्धारित २० ओभरमा ५ विकेट गुमाएर २ सय ३० रन बनाएको छ।

चेन्नईका लागि डेवाल्ड ब्रेभिस र डेभोन कन्वेले अर्धशतक बनाए । ब्रेभिसले २३ बलमा ४ चौका र ५ छक्काको सहयोगमा सर्वाधिक ५७ रन बनाए ।

कन्वेले ३५ बलमा ६ चौका र २ छक्काको सहयोगमा ५२ रन जोडे । उर्विल पटेल १९ बलमा ४ चौका र २ छक्काको सहयोगमा ३७ रनमा आउट भए ।

ओपनर आयुष महेत्र १७ बलमा ३ चौका र ३ छक्काको सहयोगमा ३४ रनमा आउट भए । शिभम दुवेले ८ बलमा १७ रन बनाए । रविन्द्र जडेजा १८ बलमा १ चौका र १ छक्काको सहयोगमा २१ रनमा अविजित रहे ।

गुजरातका लागि प्रसिद्ध कृष्णाले २ तथा साई किशोर, राशिद खान र साहरुख खानले समान १ विकेट लिए ।

दुवै टोली यो सिजनको लिग चरणको अन्तिम खेल खेल्दै छन् । गुजरात यो खेल जितेर लिग चरणको शीर्ष स्थानमा रहँदै पहिलो क्वालिफायरमा स्थान पक्का गर्न चाहान्छ ।

लिगको पुछारमा रहेको चेन्नई जितका साथ सिजन समाप्तिको लक्ष्यमा रहेको छ । आजै कोलकाता नाइटराईडर्स र सनराइजर्स हैदराबादबीचको खेल साँझ ७:४५ बजे सुरु हुनेछ ।