एजेन्सी – लाहोर क्वालेन्दरस् क्वेटा ग्लाडियर्सलाई हराउँदै १०औं पाकिस्तान सुपर लिग (पिएसएल) को च्याम्पियन बनेको छ ।

लाहोरले आइतवार राति भएको फाइनलमा क्वेटालाई ६ विकेटले हरायो । २ सय २ रनको लक्ष्य लाहोरले निर्धारित २० ओभरको १ बल बाँकी रहँदा ४ विकेट गुमाएर पूरा गर्यो ।

लाहोरको जितमा कुशल परेराले अविजित अर्धशतकीय पारी खेले । कुशलले ३१ बलमा ५ चौका र ४ छक्काको सहयोगमा नट आउट रहँदै ६१ रन जोडे ।

अन्तिम ओभरमा जितका लागि १३ रन आवश्यक रहेकोमा कुशलले ४ तथा सिकन्दर राजाले समान १ चौका र छक्काको सहयोगमा ११ रन बनाए ।

राजाले छक्का र चौका प्रहार गर्दै टोलीलाई जिताएका थिए । राजाले ७ बलमा २ चौका र २ छक्काको सहयोगमा नट आउट २२ रन जोडे।

ओपनर मोहम्मद नइमले २७ बलमा १ चौका र ६ छक्काको सहयोगमा ४६ रन बनाए । अर्का ओपनर फखर जमाम ११ तथा भानुका राजापाक्षे १४ रनमा आउट भए ।

अब्दुल्लाह सफिक २८ बलमा ४ चौका र १ छक्काको सहयोगमा ४१ रन बनाए । क्वेटाका लागि उस्मान तारिक, मोहम्मद आमीर, अब्बार अहमद र फहिम असरफले समान १ विकेट लिए ।

त्यसअघि गद्दाफी क्रिकेट स्टेडियम लाहोरमा टस जितेर पहिले ब्याटिङ गरेको क्वेटाले निर्धारित २० ओभरमा ९ विकेट गुमाएर २ सय १ रन बनायो ।

क्वेटाका हसन नवाजले ४३ बलमा ८ चौका र ४ छक्काको सहयोगमा सर्वाधिक ७६ रनको अर्धशतकीय इनिङ खेले ।

आविष्का फर्नान्डो २९, फहिम असरफ २८, राइली रउसो र दिनेश चण्डिमल समान २२ तथा ओपनर फिना एलेन १२ रनमा आउट भए ।

लाहोरका कप्तान शाहिन शाह अफ्रिदीले ३, सलमान र्मिजा र हरिस रउफले समान २ तथा सिकन्दर राजाले १ विकेट लिए ।

लाहोर तेस्रो पटक पिएसएल च्याम्पियन बनेको हो । यसअघि सन् २०२२ तथा २०२३ को संस्करणमा लाहोर च्याम्पियन भएको थियो । सन् २०१९ को च्याम्पियन क्वेटा तेस्रो पटक उपविजेता बन्यो ।