धादिङ(हाम्रो खेलकुद) – निलकण्ठ नगरपालिकाले धादिङ अन्तरपालिका स्तरीय यु-१९ टि ट्वान्टी क्रिकेट प्रतियोगिताकाे फाइनलमा बेनीघाट रोराङलाई पराजित गर्दै उपाधि जितेको छ ।

१ सय ५२ रनको लक्ष्य पछ्याएको बेनीघाट रोराङ ९७ रनमा समेटियो । बेनिघाटका लागि सुरुवाती ब्याटरहरुले खासै रन बनाउन नसक्दा सुरुमै दवावमा परेको थियो ।

तर, मध्यक्रमका ब्याटर इशाक मियाले ३५ बलमा नटआउट रहदै ब्यक्तिगत ५६ रनको योगदान दिए । बेनिघाटका अर्का ब्याटर वीलियम श्रेष्ठले १६ बलमा १९ रनको योगदान दिएका थिए ।

बलिङ तर्फ नीलकण्ठ नगरपालिका कृतन गुरुङले ३ ओभरमा १२ रन खर्चिएर ३ विकेट लिएका थिए । त्यस्तै राहुल रोक्काले ३ ओभरमा १९ रन दिएर २ विकेट लिएका थिए ।

त्यसअघि टस हारेर व्याटिङको निम्तो पाएको नीलकण्ठले ७ विकेटको गुमाएर १ सय ५१ रनको योगफल तयार गरेको थियो । निलकण्ठका लागि ब्याटर सन्दिप श्रेष्ठले ३१ बलमा सर्वाधिक ६१ रन जोड्दा अर्का ओपनर सुसान रेग्मीले ३५ बलमा ४५ रनको योगदान दिए ।

बलिङ तर्फ बेनिघाटका अनमोल पाण्डेले २ ओभरमा १७ रन दिएर ४ विकेट हात पारे । त्यस्तै बेनिघाटका अर्का बलर श्रीजन पाण्डेले ३ ओभरमा ३० रन खर्चिएर २ विकेट लिए ।

धादिङ जिल्ला क्रिकेट संघको आयोजनामा जेष्ठ १५ देखि भएको प्रतियोगितामा नीलकण्ठका सन्दिप श्रेष्ठ उत्कृष्ट खेलाडी तथा नीलकण्ठ कै आयुष भट्ट उत्कृष्ट बलर घोषीत भए ।

उत्कृष्ट ब्याटरमा बेनीघाट रोराङका श्रीजन पाण्डे र उदयमान खेलाडीमा बेनीघाट रोराङका १२ वर्षिय अनमोल पाण्डे घोषित भएका थिए ।

प्रतियोगीताकै अवसरमा धादिङ जिल्लामा जन्मिएर बागमती प्रदेशको प्रतिनिधित्व गदै राष्ट्रिय स्तरको महिला क्रिकेट खेलेका नीलकण्ठ नगरपालिका वडा नं ८ कि अप्सरा कुमाल र सिद्धलेक गाउँपालिका वडा नं ७ की सानिया गिरीलाई धादिङ जिल्ला क्रिकेट संघको तर्फबाट सम्मान गरिएको थियो ।

विजेता खेलाडीहरुलाई कार्यक्रमका प्रमुख अतिथि बेनीघाट रोराङका पालिका प्रमुख कृष्ण बहादुर थपलिया, विशेष अतिथि नीलकण्ठ नगरपालिकाका उप प्रमुख दिपक विश्वकर्मा, प्रमुख प्रशासकीय अधिकृत पुरुषोत्तम सुवेदी लगायतले पुरस्कार वितरण गरेका थिए ।

नेपाल क्रिकेट संघ (क्यान) को जिल्ला सदस्य मान्यता तयारी मा रहेको धादिङले घरेलु क्रिकेटमा काम गर्दै आएको छ । सिनियरतर्फ धादिङ टि ट्वान्टी लिग आयोजना गर्दै आएको छ ।

यस वर्ष जिल्ला लिग थप उत्कृष्ट गर्ने तयारी गरेको संघका अध्यक्ष दिपेश कंडेलले बताए । धादिङ दुई वर्ष अघि बागमति प्रदेश स्तरिय क्रिकेट प्रतियोगिता मा उप विजेता बनेको थियो । त्यस बेला काठमाडौं , काभ्रे र रसुवालाई हराउदा फाइनलमा मकवानपुरसँग हार्न पुगेको थियो ।