एजेन्सी – इण्डियन प्रिमियर लिग(आइपिएल) को फाइनल पुग्नका लागि मुम्बई इण्डियन्सले पन्जाब किंग्सलाई २ सय ४ रनको विशाल लक्ष्य दिएको छ ।

नरेन्द्र मोदी क्रिकेट स्टेडियम अहमदावादमा पन्जाबले टस जितेर फिल्डिङ रोजेको थियो। पहिला ब्याटिङ गरेको मुम्बईले निर्धारित २० ओभरमा ६ विकेट गुमाएर २ सय ३ रन बनाएको छ ।

मुम्बईका सूर्यकुमार यादवले र तिलक बर्माले सर्वाधिक समान ४४ रन बनाए । जोनी ब्रेयस्ट्रो २४ बलमा ३ चौका र २ छक्काको सहयोगमा ३८ रन जोडे ।

नमन धिर १८ बलमा ३७ तथा कप्तान हार्दिक पाण्ड्या १३ बलमा १५ रनमा आउट भए ।

पञ्जाबका अजमतुल्लाह उमरजाइले २, विजय कुमार बैशाख, युजभेन्द्र चहल,कायल जेमिन्सन र मार्कस स्टोइनसले समान १ विकेट लिए ।

पहिलो क्वालिफायरमा रोयल च्यालेन्जर्स बैंगलुरु (आरसिबी) सँग पराजित पन्जाबले इलिमिनेटरको विजेता मुम्बईको सामना गरेको हो । इलिमिनेटरमा गुजरात टाइटन्सलाई हराउँदै मुम्बईले दोस्रो क्वालिफायरको यात्रा तय गरेको हो ।

पहिलो क्वालिफायरमा पराजित पञ्जाबले फाइनल प्रवेशका लागि दोस्रो मौका पाएको हो । पहिलो क्वालिफायरमा पञ्जाबलाई हराएको आरसिबीले फाइनल पुगिसकेको छ। दोस्रो क्वालिफायसको विजेता टोलीले मंगलवार उपाधिका लागि आरसिबीसँग खेल्नेछ ।

यो सिजनमा मुम्बई र पञ्जाबले १ पटक खेलेका छन् । त्यसमा पञ्जाब ७ विकेटले विजयी भएको थियो । मुम्बई र पञ्जाब आइपिएलको इतिहासमा यसअघि ३३ पटक आमनेसामने भएका छन् । जसमा मुम्बई १७ पटक र पञ्जाब १५ खेलमा विजयी भएको छ । १ खेल बराबरीमा सकिएको थियो ।