काठमाडौं(हाम्रो खेलकुद) – कप्तान विपिन प्रसाद शर्माको ५ विकेट लिएपछि कर्णाली प्रदेशले टिबी शाह मेमोरियल यु १६ राष्ट्रिय प्रतियोगितामा पहिलो जित हासिल गरेको छ ।

कालिन्चोक क्रिकेट मैदान सुर्खेतमा भएको प्रतियोगिताको दोस्रो खेलमा कर्णालीले सुदूरपश्चिम प्रदेशलाई ५ विकेटले हराएको छ।

५६ रनको लक्ष्य कर्णालीले १८.३ ओभरमा ५ विकेट गुमाएर पूरा गर्यो । कर्णालीको जितमा नेत्र विक्रम खत्रीले २० बलमा सर्वाधिक १५ रन जोडे । कर्णालीका अन्य ब्याटरले दोहोरो अंकमा रन जोड्न सकेनन् ।

सुदूरपश्चिमका कप्तान सचिन भट्टले ३, रवि दमाई र सुवोध तिवारीले समान १ विकेट लिए ।

त्यसअघि टस जितेर ब्याटिङ गरेको सुदूरपश्चिम १७ ओभरमा ५५ रनमा समेटिएको थियो । सुदूरपश्चिमका लागि ओपनर विक्रम बोहोराले २१ रन बनाए । अन्य ब्याटरले दोहोरो अंकमा रन जोड्न सकेनन् ।

सुदूरपश्चिमका ६ ब्याटरले रनको खाता नै खोल्न सकेनन् । सुदूरपश्चिमको इनिङ धरासाही बनाउँन कर्णालीका कप्तान विपिनले ४ ओभरमा २ रन खर्चिएर ५ विकेट लिए । विजय बाहोराले ३ र नविन न्यौपानेले २ विकेट लिए ।

पहिलो खेलमा मधेश प्रदेशसँग पराजित कर्णाली २ खेलबाट २ अंकका साथ तेस्रो स्थानमा छ । सुदूरपश्चिम पहिलो खेलमा कोशी प्रदेशसँग पराजित भएको थियो।