एजेन्सी – इण्डियन प्रिमियर लिग (आइपिएल) को फाइनलमा पञ्जाब किंग्सले टस जितेको छ।

रोयल च्यालेन्जर्स बेंगलुरु (आरसिबी) सँगको फाइनलमा पञ्जाबले टस जितेको हो । नरेन्द्र मोदी क्रिकेट स्टेडियम अहमदावादमा पञ्जाबका कप्तान श्रेयस अय्यरले टस जितेर बलिङ रोजेका हुन् ।

लिग चरणमा पन्जाब पहिलो र ‌आरसिबी दोस्रो स्थानमा रहेका थिए । यी दुई टोली पहिलो क्वालिफायर खेलेका थिए । जसमा पञ्जाबलाई हराउँदै आरसिबीले फाइनलमा पुगेको थियो ।

पञ्जाबले दोस्रो क्वालिफायरमा मुम्बई इण्डियन्सलाई हराउँदै पुनः आरसिबीसँगको भेट पक्का गरेको थियो।

आइपिएलको जारी १८औं संस्करणमा आरसिबी र पञ्जाबबीच यो चौथो भेट हो । यसअघिका ३ भेटमा २ पटक आरसिबी र १ पटक पञ्जाब विजयी भएको थियो ।

पञ्जाब र आरसिबी जो‌ जितेपनि पहिलो पटक च्याम्पियन बन्नेछ । यस फाइनल पश्चात आइपिएलले ८औं च्याम्पियन टिम पाउने छ । यसअघि ७ टोलीले आइपिएल जितेको छ।

आरसिबी चौथो पटक फाइनल खेल्दैछ । यसअघि फाइनलमा सन् २००९ मा डेक्कन चार्जससँग ६ रन, २०११ मा चेन्नई सुपर किंग्ससँग र २०१६ मा सनराइजर्स हैदराबादसँग पराजित भएको थियो ।

आरसिबीले पछिल्लो फाइनल खेलेका विराट कोहली मात्र अहिलेको टोलीमा छन् । पञ्जाब दोस्रो पटक फाइनलमा खेल्दैछ। २०१४ को फाइनलमा पञ्जाबलाई कोलकाता नाइटराइडर्सले हराएको थियो । त्यो फाइनल खेलेका कुनै खेलाडी अहिले पञ्जाब टोलीमा छैनन् ।

आरसिबी र पञ्जाबबीच हालसम्म ३६ खेल भएको छ । पञ्जाब र आरसिबी समान १८ खेलमा विजयी भएको छ। नरेन्द्र मोदी क्रिकेट स्टेडियममा आरसिबी र पञ्जाबबीच यसअघि १ खेल भएको थियो । २०२१ मा भएको त्यो खेलमा पञ्जाब ३४ रनले विजयी भएको थियो ।