काठमाडौं(हाम्रो खेलकुद) – अभय यादवको ७ विकेटको सहयोगमा मधेश प्रदेशले टिबी साह मेमोरियल यु १६ प्रतियोगितामा लगातार दोस्रो जित हासिल गरेको छ ।

लगातार दोस्रो जित हासिल गर्ने क्रममा मधेशले गण्डकी प्रदेशलाई ५ विकेटले पराजित गर्यो । गण्डकीले दिएको १ सय ५ रनको लक्ष्य मधेशले १४.१ ओभरमा ५ विकेट गुमाएर पूरा गर्यो । मधेशको जितमा ओपनर सुसान्त सिंहले १५ बलमा ४ चौका र १ छक्काको सहयोगमा सर्वाधिक २५ रन जोडे । शेख अर्मन १४ बलमा २ चौका र २ छक्काको सहयोगमा २३ रनमा अविजित रहे ।

माहि यादव १८ बलमा १३ तथा नुमअर अहमद १० रनमा आउट भए । गण्डकीका लागि राज परियारले ३ तथा कप्तान सुप्रिम सुनार र अनिश राउतले समान १ विकेट लिए ।

त्यसअघि विरेन्द्रनगर क्रिकेट मैदान सुर्खेतमा टस जितेर गण्डकीले पहिले ब्याटिङ गरेकोमा ३२.२ ओभरमा १ सय ४ रनको योगफलमा समेटिएको थियो ।

गण्डकीका लागि रोज श्रेष्टले ३२ बलमा ४ चौकाको सहयोगमा सर्वाधिक २० रन जोडे । रमित कँडेल १५, विनय कार्की १४, कप्तान सुप्रिम सुनार ११ रनमा आउट हुँदा करण गैरे १० रनमा अविजित रहे ।

गण्डकीको इनिङ धराशाही बनाउँन मधेशका लागि अभयले ८.२ ओभरमा १९ रन खर्चिएर ७ विकेट लिए । धिरेन्द्र पासवानले २ तथा नुमअर अहमदले १ विकेट लिए ।

मधेशले पहिलो खेलमा कर्णाली प्रदेशलाई ९२ रनले पराजित गरेको थियो । मधेश २ खेलमा ४ अंकका साथ तालिकाको शीर्ष स्थानमा छ । गण्डकी पहिलो खेलमा लुम्बिनी प्रदेशसँग फराकिलो अन्तरले पराजित भएको थियो । २ खेलमा गण्डकी अंक बिहिन रहेको छ ।

सिंगल राउन्ड रोविनमा हुने प्रतियोगितामा सात प्रदेश सहभागी रहेकाे छ । लिग चरणको खेलमा शीर्ष दुई टोलीले फाइनल खेल्नेछन् । फाइनल जेठ ३१ गते हुनेछ ।

यस प्रतियोगिता एसिसी मेन्स यु १६ इष्ट जोन कप २०२५ का लागि छनोटका रुपमा समेत रहेको छ ।