काठमाडौं (हाम्रो खेलकुद) – रोशन शाहीको अलराउण्ड प्रदर्शनमा कर्णालीले बिहीवार टिबी साह मेमोरियल राष्ट्रिय यु१६ प्रतियोगितामा बागमती प्रदेशलाई पराजित गरेको छ ।

तेस्रो खेलमा लगातार दोस्रो जित निकाल्ने क्रममा कर्णालीले बागमतीलाई ३ विकेटले हराएको हो । २ सय ३९ रनको लक्ष्य कर्णालीले ३९ ओभरमा ७ विकेट गुमाएर पूरा गर्यो ।

कर्णालीको जितमा महत्वपूर्ण भूमिका निर्वाह गर्ने क्रममा रोशनले अर्धशतक बनाउँनुको साथै ३ विकेट लिए । रोशनले ६५ बलमा ६ चौका र २ छक्काको सहयोगमा अविजित ६९ रन जोडे ।

भुपेन्द्रजंग शाही ५० बलमा ७ चौका र ३ छक्कासहित ६७ रनको अर्धशतकीय पारी खेले । ओपनर कस्तुप खड्का ५४ बलमा ५ चौका र १ छक्काको सहयोगमा ३९ रनमा आउट भए ।

विजय बाहोरा १४ तथा नमन सिंह थापा १३ रनमा आउट भए । बागमतीका लागि कप्तान प्रसिद्ध जैशी र रोमन भट्टराईले समान २ तथा राजेश बोहोरा, रोहित ठाकुर र कमल शाहीले समान १ विकेट लिए ।

कालिन्चोक क्रिकेट मैदान सुर्खेतमा त्यसअघि टस जितेर ब्याटिङ रोजेको बागमतीले ४७.५ ओभरमा अल आउट हुँदै २ सय ३८ रन बनायो ।

बागमतीका लागि जोय थापाले १ सय १ बलमा ९ चौकाको सहयोगमा सर्वाधिक ७० रन जोडे । शिवशक्ति महतो ८१ बलमा ५ चौकाको सहयोगमा ४६ रर बनाए ।

ओपनर सुर्याशुं कोइराला ४०, राजेश बोहोरा १८, कप्तान प्रसिद्ध १६, रोहत ठाकुर १३ रनमा आउट भए । कर्णालीका लागि कैलाश खड्काले ४, रोशनले ३, कप्तान विपिन शर्माले २ तथा विजय बोहोराले १ विकेट लिए ।

पहिलो खेलमा पराजित कर्णालीले त्यसपछिका दुई खेलमा जितका साथ ४ अंक बनाएको छ । पहिलो खेलमा विजयी बागमतीको २ अंक छ ।

सिंगल राउन्ड रोविनमा हुने प्रतियोगितामा ७ प्रदेश सहभागी छ । शीर्ष दुई टोलीले जेठ ३१ गते फाइनल खेल्नेछन् ।

यो प्रतियोगिता एसिसी मेन्स यु १६ इष्ट जोन कप २०२५ का लागि छनोटका रुपमा समेत रहेको छ ।