काठमाडौं (हाम्रो खेलकुद) – कविराज खत्रीको ६ विकेटको सहयोगमा कोशी प्रदेशले टिबी साह मेमोरियल राष्ट्रिय यु-१६ प्रतियोगितामा जित हासिल गरेको छ ।

तेस्रो खेलमा दोस्रो जित निकाल्ने क्रममा बिहीवार कोशीले लुम्बिनी प्रदेशलाई २१ रनले हरायो । १ सय ८२ रनको लक्ष्य पछ्याएको लुम्बिनीले ३४.३ ओभरमा अल आउट हुँदै १ सय ६० रन समेटियो ।

लुम्बिनीका लागि अघिल्लो खेलमा दोहोरो शतक बनाएका रौनक श्रीवास्तव र आरिफ खानले अर्धशतक बनाए पनि टोलीलाई जित दिलाउन सकेनन् । श्रीवास्तव ७२ बलमा ९ चौकाको सहयोगमा ६६ रन बनाए ।

आरिफले ४७ बलमा ८ चौका र १ छक्काको सहयोगमा ५० रन जोडे । लक्ष्मण कुमालले १२ रन बनाउनु बाहेक लुम्बिनीका अन्य ब्याटरले दोहोरो अंकमा रन बनाउन सकेनन् ।

एक समय १ सय ११ रनमा ३ विकेट गुमाएर बलियो स्थितिमा रहेको लुम्बिनीले बाँकी ४९ रन जोड्दा ७ विकेट गुमायो ।

कोशीका कविराजले ८.३ ओभरमा २१ रन खर्चिएर ६ विकेट लिए । सुयोग भट्टराईले ३ तथा रविन मण्डलले १ विकेट आफ्नो नाममा गरे ।

विरेन्द्रनगर क्रिकेट मैदान सुर्खेतमा त्यसअघि टस जितेर ब्याटिङ रोजेको कोशीले ४९ ओभरमा अल आउट हुँदै १ सय ८१ रन बनायो ।

कोशीका ओपनर अलिस मण्डलले ९४ बलमा १० चौकाको सहयोगमा सर्वाधिक ६० रनको अर्धशतकीय इनिङ खेले ।

रविन मण्डल ७७ बलमा २ चौकाको सहयोगमा ३९ रनमा आउट भए । कप्तान शिवान्स बजगाईं १७ तथा सुयोग भट्टराई १६ रनमा आउट भए । लुम्बिनीका लागि लक्ष्मण कुमालले ४, प्रिन्स पालले ३ तथा चन्द्र थापाले २ विकेट लिए ।

कोशीले ४ अंक बनाएको छ । दोस्रो खेलमा पहिलो हार बेहोरेको लुम्बिनीको २ अंक छ ।

सिंगल राउन्ड रोविनमा हुने प्रतियोगितामा ७ प्रदेश सहभागी छन् । शीर्ष दुई टोलीले जेठ ३१ गते फाइनल खेल्नेछन् ।

यो प्रतियोगिता एसिसी मेन्स यु १६ इष्ट जोन कप २०२५ को लागि छनोटका रुपमा समेत रहेको छ ।